لاہور : سمن آباد میں معمولی جھگڑے پر ہونے والی اندھا دھند فائرنگ کے نتیجے میں ایک شخص موقع پر ہی دم توڑ گیا جبکہ دوسرا شدید زخمی ہو گیا، پولیس نے مقدمہ درج کر کے قانونی کارروائی کا آغاز کر دیا ہے۔
تفصیلات کے مطابق سمن آباد مسلم روڈ کے رہائشی خواجہ مجاہد مظفر بٹ نے پولیس کو دیے گئے بیان میں موقف اختیار کیا کہ گزشتہ رات ان کے بھائی زاہد بٹ عرف پپو کے بیٹوں دانیال اور فرہاد کا محلے کے ہی رہائشی شعیب بٹ کے گھر والوں کے ساتھ جھگڑا ہوا تھا۔ زاہد بٹ نے شعیب بٹ کو سمجھانے کی کوشش کی تو ملزم طیش میں آ گیا اور اپنے بیٹوں کو آوازیں دیں۔ باپ کی آواز سنتے ہی ملزم شعیب بٹ کے بیٹوں دانیال اور فرہاد نے گھر سے باہر نکل کر اندھا دھند فائرنگ شروع کر دی۔
فائرنگ کے نتیجے میں زاہد بٹ عرف پپو آنکھ اور دماغ پر گولیاں لگنے کے باعث موقع پر ہی جاں بحق ہو گئے، جبکہ فائرنگ کی آواز سن کر باہر آنے والے مقتول کے بھتیجے حسین بٹ کو بھی پیٹ اور پسلی میں دو گولیاں لگیں، جس سے وہ شدید زخمی ہو گئے۔ زخمی نوجوان کو تشویشناک حالت میں سروسز ہسپتال منتقل کر دیا گیا ہے جہاں وہ موت اور زندگی کی کشمکش میں ہے۔ پولیس نے تھانہ سمن آباد میں ملزمان شعیب بٹ، دانیال اور فرہاد کے خلاف قتل اور اقدامِ قتل سمیت دیگر سنگین دفعات کے تحت مقدمہ درج کر کے تفتیش شروع کر دی ہے۔
