نواب شاہ (رپورٹ: نفیس آرائیں)
ڈپٹی کمشنر شہید بینظیرآباد عبدالصمد نظامانی کی زیر صدارت تھیلیسیمیا میں مبتلا بچوں کو چائلڈ لائف فاؤنڈیشن کے ایمرجنسی سینٹر میں بروقت اور معیاری علاج کی سہولیات کی فراہمی کے حوالے سے ایک اہم اجلاس منعقد ہوا۔اجلاس سے خطاب کرتے ہوئے ڈپٹی کمشنر عبدالصمد نظامانی نے کہا کہ تھیلیسیمیا کے مریض بچے خصوصی توجہ کے مستحق ہیں اور ان کے علاج و معالجے میں کسی قسم کی غفلت یا کوتاہی ہرگز برداشت نہیں کی جائے گی۔ انہوں نے ڈسٹرکٹ ہیلتھ آفیسر، تھیلیسیمیا سینٹر اور چائلڈ لائف فاؤنڈیشن کے ذمہ داران کو ہدایت کی کہ باہمی رابطوں اور ادارہ جاتی ہم آہنگی کو مزید مؤثر بنایا جائے تاکہ طے شدہ ایس او پیز کے مطابق مریض بچوں کو بروقت ایمرجنسی سینٹر منتقل کرکے بہتر طبی سہولیات فراہم کی جا سکیں۔اجلاس میں ڈسٹرکٹ ہیلتھ آفیسر ڈاکٹر مدثر حسین، اسسٹنٹ کمشنر اقبال احمد تنیو، چائلڈ لائف فاؤنڈیشن کے انچارج ڈاکٹر نعمان مشتاق، تھیلیسیمیا سینٹر کے سیکریٹری ڈاکٹر محمد صادق سیال، جوائنٹ سیکریٹری غلام نبی چنہ سمیت متعلقہ افسران نے شرکت کی۔ شرکاء نے تھیلیسیمیا کے مریض بچوں کی فلاح و بہبود کے لیے ضلعی انتظامیہ کے ساتھ مکمل تعاون جاری رکھنے کے عزم کا اظہار کیا۔