مختلف حادثات، فائرنگ، ڈوبنے اور دیگر افسوسناک واقعات میں 8 افراد جاں بحق جبکہ 93 سے زائد زخمی

شیخوپورہ (رپورٹ اسامہ طفیل )عیدالاضحیٰ کے دنوں میں ضلع بھر میں پیش آنے والے مختلف حادثات، فائرنگ، ڈوبنے اور دیگر افسوسناک واقعات کے نتیجے میں مجموعی طور پر 8 افراد جاں بحق جبکہ 93 سے زائد زخمی ہو گئے۔تفصیلات کے مطابق لاہور سے فیصل آباد جانے والی ٹرین جب گاؤں مسن کالر کے قریب رکی تو ایک معمر شخص ٹرین میں سوار ہوتے ہوئے ریلوے اسٹیشن کی دیوار سے ٹکرا کر جاں بحق ہو گیا۔ تھانہ کوٹ عبدالمالک کی حدود سکیم نمبر 3 عباس چوک سے ایک نامعلوم نوجوان کی لاش بھی برآمد ہوئی ڈسٹرکٹ جیل شیخوپورہ کا ایک بیمار حوالاتی، جو ٹی بی کے مرض میں مبتلا تھا، ڈسٹرکٹ ہسپتال میں دوران علاج دم توڑ گیا۔ علاوہ ازیں تحصیل فیروزوالہ کے علاقے حسین ٹاؤن میں تیز رفتار نامعلوم کار کی ٹکر سے 60 سالہ شخص موقع پر جاں بحق ہو گیا۔نارووال روڈ چوڑا راجپوتاں کے قریب ٹرک اور موٹر سائیکل کے تصادم میں یاسین کمبوہ دوران علاج چل بسا، جبکہ اپر چناب کینال خانپور میں 18 سالہ نوجوان تصور علی نہاتے ہوئے ڈوب گیا۔ کوٹ عبدالمالک کے ایک سوئمنگ پول میں بھی خرم مسیح ڈوب کر جاں بحق ہو گیا۔لاہور روڈ پر رکشوں کے تصادم میں 4 افراد زخمی ہوئے، جبکہ عید کے پہلے روز قصابوں کے ہاتھوں کٹنے کے واقعات میں تقریباً 80 افراد معمولی زخمی ہو کر ہسپتال پہنچے۔نبی پورہ میں گیس سلنڈر دھماکے سے ایک شخص جھلس گیا جبکہ ڈیرہ بوہلیاں والا میں آتشزدگی سے ایک نوجوان زخمی ہوا۔ کوٹ عبدالمالک اور دیگر علاقوں میں فائرنگ کے مختلف واقعات میں متعدد افراد زخمی ہوئے، جن میں ماچھیکے، گاؤں گھنگ اور نانو ڈوگراں شامل ہیں۔ بعض واقعات دیرینہ دشمنیوں کا شاخسانہ بتائے جاتے ہیں۔تحصیل شرقپور شریف کے علاقے نانو ڈوگراں میں فائرنگ اور تشدد کے نتیجے میں 6 افراد زخمی ہوئے، جن میں سے 3 کو تشویشناک حالت میں لاہور منتقل کیا گیا۔دوسری جانب تحصیل فیروزوالہ کے علاقے متین گارڈن میں آوارہ کتوں کے حملوں میں کمسن بچوں سمیت 6 افراد زخمی ہو گئے، جن میں 4 سالہ نیہا کی حالت تشویشناک بتائی جاتی ہے۔ شہریوں نے انتظامیہ کی کارکردگی پر شدید تشویش کا اظہار کرتے ہوئے مؤثر اقدامات کا مطالبہ کیا ہے۔ادھر آوارہ کتے کے کاٹنے سے زخمی 8 سالہ بچی عیشال 26 روز بعد دم توڑ گئی، جسے علاج کے لیے لاہور منتقل کیا گیا تھا۔مزید برآں سرگودھا روڈ جھامکے کے قریب دو موٹر سائیکلوں کے تصادم میں 18 سالہ افضان شوکت جاں بحق جبکہ دو افراد زخمی ہو گئے۔ ریسکیو 1122 نے بروقت کارروائی کرتے ہوئے زخمیوں کو ہسپتال منتقل کیا۔پولیس نے مختلف واقعات کے مقدمات درج کر کے تحقیقات شروع کر دی ہیں۔