ماسکو:روس نے کہا ہے کہ برکس کے رکن ممالک قیمتی دھاتوں کا ایکسچینج قائم کرنے پر کام کر رہے ہیں۔یہ بات روس کے نائب وزیر خارجہ سرگئی ریابکوف نے ملکی خبر رساں ادارے تاس کو انٹرویو میں کہی۔انہوں نے بتایا کہ مشترکہ سرمایہ کاری پلیٹ فارم ’’جس کا ذکر روسی وزیر خارجہ سرگئی لاوروف کر چکے ہیں‘‘ ایک خصوصی پلیٹ فارم قائم کرنے کی تجویز بھی زیر غور ہے جو خصوصی اقتصادی زونز میں کام کرے گا۔
ان کے مطابق تقریباً تمام برکس ممالک میں ایسے زونز موجود ہیں جنہیں باہمی تجارت اور سرمایہ کاری کے فروغ کے لیے استعمال کیا جا سکتا ہے۔انہوں نے کہا کہ حال ہی میں قیمتی دھاتوں کے ایکسچینج کے قیام کی ایک اہم تجویز سامنے آئی جس کے ساتھ ساتھ اناج کا ایکسچینج قائم کرنے کا منصوبہ بھی شامل ہے۔
روس کی 2024 میں برکس کی سربراہی کے دوران کازان میں منعقدہ سربراہی اجلاس میں متعدد روسی تجاویز پر عملدرآمد کی منظوری دی گئی ان میں متبادل ادائیگی پلیٹ فارمز، قومی کرنسیوں میں لین دین کے طریقہ کار، برکس کے اندر اور شراکت دار ممالک کے ساتھ تجارت کے لیے ری انشورنس سہولیات، اناج ایکسچینج کا قیام اور ایک نیا سرمایہ کاری پلیٹ فارم شامل ہیں۔ سرگئی ریابکوف نے کہا کہ ان اقدامات کے حوالے سے ٹھوس پیش رفت کے لیے تمام ضروری اور بنیادی شرائط موجود ہیں اور مستقبل قریب میں عملی نتائج سامنے آ سکتے ہیں۔