سپیکر پنجاب اسمبلی ملک محمد احمد خاں نے کہا ہے کہ پنجاب حکومت نے تعلیم کے لیے تاریخ کا سب سے بڑا بجٹ مختص کیاتعلیم کا بجٹ 17 ارب سے بڑھا کر 46 ارب روپے کر دیا گیا۔ سپیکر پنجاب اسمبلی ملک محمد احمد خان ملتان میں نجی یونیورسٹی کے کانووکیشن میں بطور مہمانِ خصوصی شرکت کررہے تھے۔
انہوں نے اس موقع پرخطاب کرتے ہوئے کہا کہ تعلیم ہر شہری کا بنیادی حق ہے۔سرکاری سکولوں میں 97 فیصد بچے زیرِ تعلیم ہیں۔ سرکاری و نجی تعلیمی اداروں کے اخراجات میں بڑا فرق ہے۔ حکومتِ پنجاب سرکاری تعلیمی اداروں کا معیار بہتر بنانے پر کام کر رہی ہے۔ انہوں نے کہا کہ تعلیمی سہولیات میں بہتری حکومتِ پنجاب کی اولین ترجیح ہے۔ تعلیم میں سرمایہ کاری دراصل قوم کے مستقبل میں سرمایہ کاری ہے۔
سپیکر ملک محمد احمد خاں کا مزید کہنا تھا کہ نجی تعلیمی ادارے تعلیمی مساوات کے فروغ میں حکومت کا ساتھ دیں۔ جبکہ فارغ التحصیل طلبہ ملک کی ترقی کا عملی کردار بنیں۔
سپیکر ملک محمد احمد خاںنے نجی یونیورسٹی کے کانووکیشن میں طلبہ میں ڈگریاں اور اسناد تقسیم کیں۔