اسلام آباد:خارجی دہشت گرد احسان اللہ ولد عبدالجنان، قوم محسود نے ہوشربا انکشافات کرتے ہوئے کہا کہ فتنہ الخوارج مذہب کے نام پر نوجوانوں کو ورغلا کر پاک فوج کے خلاف دہشت گرد کارروائیوں میں استعمال کرتے ہیں۔
انہوں نے اعتراف کیا کہ وہ تین سال تک کمانڈر بدری، کمانڈر مشتاق، کمانڈر گرنیڈ اور کمانڈر اسلام الدین کی سہولت کاری کرتے رہے اور بکتر بند گاڑی و تتور میں پولیس اسٹیشن پر حملے سمیت مختلف کارروائیوں میں حصہ لیا۔
خارجی دہشت گرد نے بتایا کہ کئی کمانڈر اپنے ذاتی مفادات کے لیے نوجوانوں کو بدکاری کی طرف بھی اکساتے تھے۔ انہوں نے کہا کہ خوارج نے جھوٹ بولا کہ پاک فوج کافر ہے، جبکہ حقیقت میں خوارج خود کافر اور مرتد ہیں۔ احسان اللہ نے اعتراف کیا کہ انہوں نے پاک فوج کے جوانوں کو پانچ وقت نماز پڑھتے دیکھا اور نماز و کلمے سیکھے جو پہلے نہیں آتے تھے۔
انہوں نے نوجوانوں سے اپیل کی کہ وہ پاک فوج کا ساتھ دیں تاکہ دہشت گرد عناصر کی روک تھام اور خاتمہ ممکن ہو سکے۔ سیکیورٹی فورسز ملک سے فتنہ الخوارج کے دہشت گردوں کے خاتمے کے لیے پرعزم ہیں۔