کراچی: پاکستان کی بحری تاریخ میں ایک نیا سنگِ میل عبور کر لیا گیا۔ دنیا کے جدید ترین اور سب سے بڑے کنٹینر بردار جہازوں میں شامل "ایم ایس سی مِکول” ساوتھ ایشیا پاکستان ٹرمینل پر کامیابی سے لنگر انداز ہو گیا۔
400 میٹر طویل اور 24 ہزار ٹی ای یو ایس گنجائش والے اس جہاز کو ٹرمینل نے مکمل طور پر ہینڈل کر کے پاکستان کی بندرگاہی صلاحیت کا بھرپور مظاہرہ کیا۔
وفاقی وزیر بحری امور محمد جنید انوار چوہدری نے جہاز کی آمد پر خوشی کا اظہار کرتے ہوئے کہا کہ ایم ایس سی مِکول کی آمد پاکستان کے لیے ایک تاریخی لمحہ ہے۔ بین الاقوامی شپنگ لائنز کا پاکستان پر اعتماد بڑھ رہا ہے، اور ہمارا میری ٹائم سیکٹر ملکی معیشت کی مضبوط بنیاد بننے جا رہا ہے۔ پاکستان ابھرتی ہوئی شپنگ منزل بن چکا ہے۔
یہ پیشرفت نہ صرف پاکستان کی بندرگاہوں کی استعداد کو ظاہر کرتی ہے بلکہ عالمی شپنگ نیٹ ورک میں ملک کی بڑھتی ہوئی اہمیت کی بھی عکاسی کرتی ہے۔