لاہور:وزیراعلیٰ پنجاب مریم نواز شریف نے افغانستان کی جانب سے پاکستانی علاقوں پر بلا اشتعال جارحیت کی شدید الفاظ میں مذمت کی ہے۔
اپنے ایک بیان میں وزیراعلیٰ نے پاک فوج کے دلیرانہ اور مؤثر جواب کو سراہتے ہوئے بہادر افواج کو زبردست خراجِ تحسین پیش کیا۔ مریم نواز شریف نے کہا کہ پاک فوج پوری قوم کی عزت، غیرت، عزم اور وقار کی علمبردار ہے۔ پاکستان کی سرحدیں مقدس امانت ہیں اور ان کی حفاظت ہر پاکستانی کا فرض ہے۔
انہوں نے کہا کہ افغان جارحیت کا جواب اس بات کا واضح پیغام ہے کہ پاک سرزمین امن کی ضامن ہے، کمزوری کی علامت نہیں۔مریم نواز شریف نے کہا کہ پاکستان اور پنجاب کے عوام اپنی بہادر افواج کے ساتھ سیسہ پلائی دیوار کی طرح کھڑے ہیں۔وزیراعلیٰ پنجاب نے مزید کہا کہ ہم امن چاہتے ہیں مگر پاکستان کی سالمیت یا شہریوں کے تحفظ پر کوئی سمجھوتہ نہیں ہوگا۔
،