لاہور : (حافظ نعیم )وزیراعلیٰ پنجاب مریم نواز شریف نے گرین ٹریکٹر سکیم کے دوسرے مرحلے کے تحت ہائی پاور ٹریکٹرز کی قرعہ اندازی کا باضابطہ آغاز کر دیا۔ تقریب میں کامیاب کسانوں کے ناموں کا اعلان کیا گیا۔
اس موقع پر وزیراعلیٰ مریم نواز نے کامیاب کسانوں کو مبارکباد پیش کی اور قصور سے تعلق رکھنے والے ایک خوش نصیب کسان محمد عاشق کو ذاتی طور پر فون کر کے قرعہ اندازی میں کامیابی کی اطلاع دی۔ وزیراعلیٰ نے پنجابی میں بات کرتے ہوئے کہا: "کیہہ حال اے؟ تسی ٹریکٹر واسطے اپلائی کیتا سی، تہاڈا ناں نکل آیا اے۔ تہانوں مبارک باد واسطے فون کیتا اے۔”
گرین ٹریکٹر سکیم فیز ٹو کے لیے مجموعی طور پر 7 لاکھ 34 ہزار سے زائد کسانوں نے درخواست دی، جن میں سے 2 لاکھ 82 ہزار کسان قرعہ اندازی کے اہل قرار پائے۔ ہائی پاور کیٹیگری میں 9 ہزار 500 کسان کامیاب ہوئے۔ اس مرحلے میں حکومت پنجاب ہائی پاور ٹریکٹرز کے لیے 10 لاکھ روپے جبکہ میڈیم پاور ٹریکٹرز کے لیے 5 لاکھ روپے فی ٹریکٹر سبسڈی فراہم کر رہی ہے۔
دلچسپ امر یہ ہے کہ 98 فیصد درخواست گزاروں نے پاکستانی ساختہ ٹریکٹرز کے لیے اپلائی کیا، جب کہ صرف 2 فیصد کسانوں نے امپورٹڈ ٹریکٹرز میں دلچسپی ظاہر کی۔ اس طلب کے نتیجے میں کئی غیر ملکی ڈیلر کمپنیوں نے پنجاب میں اپنے دفاتر قائم کرنے کا عمل شروع کر دیا ہے۔
وزیراعلیٰ کو دی گئی بریفنگ میں بتایا گیا کہ اس سکیم کے تحت مجموعی طور پر 20 ہزار ٹریکٹرز پر سبسڈی دی جائے گی، جس کا مقصد صوبے میں زرعی پیداوار کو بڑھانا اور کسانوں کو جدید زرعی مشینری کی فراہمی کو ممکن بنانا ہے۔ قرعہ اندازی کے بعد کامیاب کسانوں کو جلد ہی ٹریکٹرز فراہم کیے جائیں گے۔