لاہور : (حافظ نعیم سے )وزیرِاعلیٰ پنجاب مریم نواز شریف نے جمہوریت کے عالمی دن کے موقع پر اپنے پیغام میں کہا ہے کہ سلام ہے ان پاسبانوں کو جو آئین کی حفاظت کو جہاد سمجھتے ہیں۔ انہوں نے کہا کہ طاقت کا اصل سرچشمہ عوام ہیں اور عوام کی رائے ہی ترقی کی پہلی سیڑھی ہے۔
وزیرِاعلیٰ نے کہا کہ فتنہ و فساد اور تشدد پر مبنی رائے سازی جمہوریت کی روح کے منافی ہے۔ جمہوریت وہ نظام ہے جس میں اقتدار عوام کی دہلیز پر آتا ہے۔ انہوں نے کہا کہ معیشت جمہوریت کے بغیر پائیدار ترقی نہیں کر سکتی۔
مریم نواز شریف نے کہا کہ جمہوریت مضبوط ہوگی تو تعلیم کے دروازے کھلیں گے، سہولتیں میسر آئیں گی اور نوجوانوں کے خواب پورے ہوں گے۔ اُن کا کہنا تھا کہ جمہوریت محض حکومت سازی نہیں بلکہ عوام اور ریاست کے درمیان اعتماد کا رشتہ ہے۔
انہوں نے کہا کہ جمہوریت وہ آئینہ ہے جس میں ہم اپنی غلطیوں کو دیکھ کر درست کر سکتے ہیں۔ اختلاف رائے جمہوریت کا حسن ہے، دشمنی نہیں۔یہی سبق ہمیں اپنی آنے والی نسلوں کو دینا ہے۔
وزیرِاعلیٰ نے کہا کہ پاکستان کی جمہوریت کو صرف بچانا نہیں بلکہ نکھارنا ہے تاکہ یہ دنیا کے لیے ایک مثال بن سکے۔ انہوں نے کہا کہ جمہوریت کو آئندہ نسلوں کے لیے ایسا سرمایہ بنایا جائے گا جو وقت کی آندھیوں میں بھی قائم رہے۔