لاہور: (خصوصی رپورٹر) وزیراطلاعات پنجاب عظمی بخاری نے کہا ہے قومی لیڈر کی بیٹی ہونے کے ناطے مریم نواز شریف پوری قوم کو اپنا سمجھتی ہیں خیبر پختونخوا اورسندھ حکومتوں کی مدد کے لئے پنجاب تیار ہے۔
وزیر اطلاعات پنجاب عظمی بخاری نے خیبر پختونخوا میں سیلاب اور بارشوں سے جانی و مالی نقصان پر اظہار افسوس کیا جبکہ کراچی میں بارش سے نظام زندگی مفلوج ہونے پر اظہار تشویش کرتے ہوئے کہا کہ پنجاب بڑا بھائی ہونے کے ناطے دونوں صوبوں کے عوام سے یکجہتی کا اظہار کرتا ہے۔
انہوں نے کہاوزیراعلی پنجاب دونوں صوبائی حکومتوں کے ساتھ تعاون کے لیے تیار ہیں۔خیبر پختونخواہ اور سندھ حکومت کو پنجاب سے کسی بھی قسم کی مدد درکار ہے تو پنجاب حاضر ہے،وزیراعلی پنجاب مریم نواز نے خود علی امین سے رابطہ کر کے ہر قسم کے تعاون کی آفر کی۔
عظمی بخاری کا کہنا تھا کہ مریم نواز پاکستان کے سب سے بڑے لیڈر کی بیٹی ہیں اور مریم نواز قومی لیڈر کی بیٹی ہونے کے ناطے پوری قوم کو اپنا سمجھتی ہیں۔پنجاب بڑا بھائی ہے وہ کھلے دل کے ساتھ تمام صوبوں کی ہر قسم کی مدد کے لیے تیار ہے۔