اسلام آباد :پاکستان تحریک انصاف کے کارکنوں پر 14اگست کو دھرنے کی منصوبہ بندی کرنے کا مقدمہ درج کرلیا گیا۔ذرائع کے مطابق پی ٹی آئی کے کارکنوں کے خلاف یہ مقدمہ تھانہ شہزاد ٹاؤن میں درج کیا گیا، جس میں امن عامہ ایکٹ سمیت 8دفعات شامل کی گئی ہیں۔
واضح رہے کہ پی ٹی آئی کارکنان کو شہزاد ٹاؤن کے علاقے سے گرفتار کیا گیا تھا۔
مقدمے کے متن کے مطابق ہوسٹل سٹی میں تقریباً 40 پی ٹی آئی کارکنان دھرنے کے حوالے سے کانفرنس کررہےتھے۔ پولیس چھاپے پر پی ٹی آئی کارکنان بینرز اور ڈنڈوں سے لیس تھے۔ پی ٹی آئی کارکنان نے اشتعال انگیز نعرے بازی شروع کردی۔
مقدمے کے مطابق پی ٹی آئی کارکنان 14 اگست کو دھرنے میں شامل ہونے کا منصوبہ بنا رہے تھے۔ پولیس کو دیکھ کر پی ٹی آئی کارکنان نے مزاحمت کی اور دھاوا بول دیا۔
دوسری طرف تحریک انصاف کے طلبا ونگ کا موقف وے کہ ہوسٹل سٹی اسلام آباد میں انصاف اسٹوڈنٹس فیڈریشن اسلام آباد ریجن کے الیکشن ہورہے تھے کہ پولیس نے نہتے طلباء پر دھاوا بول دیا اور طلباء پر آنسو گیس اور ربڑ بلٹ فائر کئے جس سے مرکزی صدر امجد علی شاہ سمیت درجنوں طلبہ زخمی ہوگئے اور درجنوں طلبا کو گرفتار کرلیا گیا۔