ضلع خیرپور
ہنگورجا: رپورٹ فیاض محسن سولنگی
ہنگورجا کے قریب دیونا شاخ اسٹاپ کے نزدیک واقع گاؤں علی حیدر راجپوت کے رہائشیوں نے اصغر علی عرف ون ٹو پنجابی کی قیادت میں ہنگورجا اور رسول آباد چوکی پولیس کے مبینہ مظالم اور زیادتیوں کے خلاف احتجاج کیا۔
احتجاج کرنے والے دیہاتیوں نے میڈیا سے گفتگو کرتے ہوئے کہا کہ ہنگورجا اور رسول آباد چوکی کی پولیس انہیں ہراساں کر رہی ہے اور شدید پریشان کر رکھا ہے۔ ان کا کہنا تھا کہ پولیس روزانہ ان کے گھروں پر چھاپے مارتی ہے، انہیں بلاجواز جرائم پیشہ قرار دے کر گرفتار کرتی ہے اور بعد ازاں بھاری رشوت لے کر رہا کرتی ہے۔
مظاہرین نے کہا کہ وہ شریف اور قانون پسند لوگ ہیں اور ان کا کسی بھی قسم کے جرم سے کوئی تعلق نہیں، لیکن اس کے باوجود پولیس انہیں بے گناہ ہونے کے باوجود تنگ کر رہی ہے۔
انہوں نے الزام عائد کیا کہ چند روز قبل ہنگورجا کے سابق ایس ایچ او الھودایو پتافی، پولیس اہلکار بشارت سہتو، رسول آباد چوکی انچارج جاوید جونیجو اور دیگر اہلکاروں نے ان کے گھروں پر چھاپے مارے، چادر اور چار دیواری کا تقدس پامال کیا، اور کئی بے گناہ افراد کو گرفتار کر لیا۔ مظاہرین کے مطابق بعد ازاں مبینہ طور پر 3 لاکھ روپے رشوت وصول کرنے کے بعد نوجوانوں کو رہا کیا گیا۔
دیہاتیوں نے آئی جی سندھ، ڈی آئی جی سکھر، ایس ایس پی خیرپور اور دیگر متعلقہ حکام سے اپیل کی کہ انہیں ہنگورجا اور رسول آباد چوکی پولیس کے مبینہ مظالم اور ناجائز کارروائیوں سے تحفظ فراہم کیا جائے اور ان کے ساتھ انصاف کیا جائے۔