خانیوال( اصغر علی کی رپورٹ)
سیکرٹری بلدیات شکیل احمد میاں نے ڈی جی ستھرا پنجاب اتھارٹی بابر صاحب دین کے ہمراہ عید الاضحی کے صفائی انتظامات کا جائزہ لینے کیلئے اہم اجلاس کی صدارت کی، جس میں خانیوال سمیت پنجاب بھر کے ستھرا پنجاب ایجنسیز کے مینجنگ ڈائریکٹرز نے ویڈیو لنک کے ذریعے شرکت کی۔اجلاس میں عید قرباں کے موقع پر جانوروں کی آلائشیں، باقیات اور کچرا سڑکوں، ندی نالوں یا کھلے مقامات پر پھینکنے والوں کے خلاف سخت قانونی کارروائی کا فیصلہ کیا گیا۔ حکام کے مطابق خلاف ورزی کرنے والوں کو 50 ہزار روپے تک جرمانہ کیا جا سکے گا۔سیکرٹری بلدیات شکیل احمد میاں نے ہدایت جاری کی کہ ہر تحصیل کیلئے الگ اور جامع صفائی پلان تیار کیا جائے جبکہ متعلقہ اضلاع کی ضروریات کے مطابق اضافی عملہ اور مشینری بھی تعینات کی جائے۔ انہوں نے کہا کہ عید سے قبل تمام ویسٹ کلیکشن پوائنٹس، ڈمپرز، لوڈر رکشوں اور دیگر مشینری کی فٹنس لازمی چیک کی جائے تاکہ آپریشن کے دوران کسی قسم کی رکاوٹ پیش نہ آئے۔اجلاس میں فیصلہ کیا گیا کہ مساجد، عیدگاہوں، مویشی منڈیوں اور آبادی والے علاقوں کے اطراف خصوصی صفائی مہم چلائی جائے گی جبکہ عید کے تینوں روز صفائی آپریشن کی نگرانی ستھرا پنجاب اتھارٹی کے سینٹرل کنٹرول روم سے ڈیجیٹل انداز میں کی جائے گی۔حکام کے مطابق خانیوال سمیت پنجاب بھر میں جدید ٹیکنالوجی سے لیس کنٹرول رومز قائم کر دیے گئے ہیں جہاں سے فیلڈ آپریشنز کی ریئل ٹائم مانیٹرنگ ممکن ہوگی۔ عید قرباں کے دوران ستھرا پنجاب کی آپریشنل ٹیمیں مسلسل 72 گھنٹے فیلڈ میں متحرک رہیں گی جبکہ ہر تحصیل میں ایمرجنسی رسپانس ٹیمیں اور بیک اپ مشینری بھی الرٹ رکھی جائے گی۔اجلاس میں یہ بھی بتایا گیا کہ صوبہ بھر کی تمام یونین کونسلز میں ماحول دوست ویسٹ بیگز مفت تقسیم کیے جائیں گے تاکہ شہری آلائشوں کو محفوظ انداز میں ٹھکانے لگا سکیں۔ سیکرٹری بلدیات نے واضح کیا کہ صفائی آپریشن میں غفلت یا کوتاہی کسی صورت برداشت نہیں کی جائے گی اور عوامی توقعات پر پورا اترنے کیلئے وسائل میں مزید اضافہ بھی کیا جا رہا ہے۔انہوں نے ہدایت کی کہ شہری آگاہی کیلئے سوشل میڈیا، بینرز، اعلانات اور مقامی مہمات کو مزید مثر بنایا جائے تاکہ عوام صفائی مہم میں بھرپور تعاون کریں۔ سیکرٹری بلدیات نے شہریوں سے اپیل کی کہ وہ اپنے علاقوں کو صاف ستھرا رکھنے کیلئے ستھرا پنجاب ٹیموں کا ساتھ دیں اور آلائشیں مقررہ مقامات پر ہی تلف کریں۔