لاہور: وزیر اعلیٰ پنجاب مریم نواز شریف نے ترک گرینڈ نیشنل اسمبلی کی یورپی یونین ہم آہنگی کمیٹی کے صدر اور رکن پارلیمان برہان کایاترک سے ملاقات کی، جس میں دوطرفہ تعلقات، معاشی، ماحولیاتی اور پارلیمانی امور پر جامع تبادلہ خیال کیا گیا۔
وزیر اعلیٰ نے پنجاب میں حالیہ سیلاب کے دوران ترکیہ حکومت اور عوام کی بروقت امداد پر خصوصی شکریہ ادا کیا اور پاکستان کے اسپیشل اکنامک زونز میں ترکیہ کی دلچسپی کا خیرمقدم کیا۔ انہوں نے پاک ترکیہ پارلیمانی وفود اور قانون ساز اداروں کے درمیان مستقل روابط بڑھانے کی اہمیت پر زور دیا۔
ملاقات میں فلڈ مینجمنٹ، کلین ٹرانسپورٹ، جنگلات کے تحفظ، واٹر کنزرویشن اور کلائمیٹ اسمارٹ انفراسٹرکچر میں مشترکہ تعاون کی ضرورت پر بھی بات ہوئی۔ وزیر اعلیٰ نے کہا کہ بدلتے ہوئے علاقائی منظرنامے میں پاک ترکیہ اعلیٰ سطح روابط امن و استحکام اور خوشحالی کے اجتماعی عزم کو مضبوط بنا رہے ہیں۔برہان کایاترک نے کہا کہ لاہور آمد ہمارے لیے باعث اعزاز ہے اور یہ دورہ لازوال بھائی چارے، مشترکہ تاریخی ورثے اور باہمی اعتماد کا زندہ ثبوت ہے۔ انہوں نے وزیر اعلیٰ کی قیادت میں پنجاب میں چند ماہ میں ایک لاکھ 20 ہزار سے زائد گھروں کی تعمیر کو بھی قابل تحسین قرار دیا۔
وزیر اعلیٰ مریم نواز شریف نے COP-30 میں پنجاب کی نمائندگی، پنجاب کلین ائیر پروگرام، سُتھرا پنجاب، اے آئی فارسٹ پروٹیکشن فورس اور پنجاب کلائمیٹ آبزرویٹری جیسے اقدامات سے وفد کو آگاہ کیا۔
انہوں نے کہا کہ پاکستان ترکیہ باہمی تجارت کو 5 ارب ڈالر تک لے جانے کے لیے مشترکہ کوششوں پر کام کرے گا اور مجوزہ اکنامک زون کا نام ’’صدر رجب طیب اردوان اسپیشل انڈسٹریل زون‘‘ رکھنے کی تجویز دی گئی ہے۔