لاہور: وزیراعلیٰ پنجاب مریم نواز شریف سے وزیرآباد اور میانوالی کے ارکان اسمبلی اور پارٹی ٹکٹ ہولڈرز نے ملاقات کی۔ ملاقات میں عوامی مسائل، ضروریات اور جاری ترقیاتی منصوبوں پر تفصیلی تبادلہ خیال کیا گیا۔
پارلیمنٹرینز نے وزیراعلیٰ مریم نواز شریف کے خصوصی پراجیکٹس کی تعریف کرتے ہوئے گرین بس پراجیکٹ کے آغاز پر خصوصی طور پر شکریہ ادا کیا۔ انہوں نے کہا کہ گرین بس کا دیہات تک پھیلاؤ وزیراعلیٰ کے عوام دوست وژن کی واضح مثال ہے۔
وزیرآباد کے ارکان اسمبلی نے ستھرا پنجاب پراجیکٹ کو شفافیت اور بہتر نظم و نسق کی کامیاب کوشش قرار دیا۔ پارلیمنٹرینز نے صوبے میں امن و امان کی بہتری کے لیے وزیراعلیٰ مریم نواز شریف کے ساتھ مکمل تعاون کا عزم ظاہر کیا۔
شرکا نے کاروباری سرگرمیوں کے فروغ کے لیے ای بز پورٹل کے اجراء پر بھی وزیراعلیٰ کو خراج تحسین پیش کیا، جبکہ نجی املاک پر قبضے ختم کرانے کے اقدامات کو تاریخی قرار دیا۔
وزیراعلیٰ مریم نواز شریف نے اس موقع پر کہا کہ عوام کی خدمت ہی مسلم لیگ (ن) اور قائد محمد نواز شریف کا منشور ہے۔ان کا کہنا تھا کہ کسان کارڈ، فری میڈیسن پراجیکٹ اور دیگر ترقیاتی منصوبے عوامی خوشحالی کی سمت اہم پیش رفت ہیں۔
وزیراعلیٰ کے مطابق پنجاب میں پہلی بار 30 لاکھ افراد کو 10 ہزار روپے کے پے آرڈر گھر کی دہلیز پر پہنچائے گئے جبکہ 15 لاکھ افراد کو راشن کارڈ کے ذریعے تین ہزار روپے ماہانہ دیے جا رہے ہیں۔
مریم نواز شریف نے واضح کیا کہ عوام کی جان و مال کی حفاظت ریاست کی اولین ذمہ داری ہے اور کسی کو انتشار پھیلانے کی اجازت نہیں دی جائے گی۔انہوں نے کہا کہ روز اول سے مخلوق خدا کی خدمت کا عزم رکھا ہے اور پنجاب کے کسانوں کو مایوس نہیں کیا جائے گا۔
پارلیمنٹرینز نے کہا کہ وزیراعلیٰ مریم نواز شریف کی شفافیت، میرٹ پالیسی اور بے لاگ قیادت نے صوبے کی تقدیر بدل دی ہے۔ ان کے مطابق میانوالی سے گرین بس پراجیکٹ کا آغاز مساوی ترقی کے وژن کی علامت ہے، اور مریم نواز شریف وعدے نبھانے والی قائد ہیں جنہوں نے عمل کو ہمیشہ ترجیح دی۔