اسلام آباد :اسلام آباد وزیر مملکت برائے داخلہ طلال چوہدری نے اسلام آباد میں نیشنل پریس کلب میں پولیس کی جانب سے تشدد اور توڑپھوڑ کے واقعے پر صحافیوں سے معذرت کی ہے۔
رپورٹ کے مطابق جمعرات کو بعض پولیس اہلکار نیشنل پریس کلب میں داخل ہوئے جہاں انہوں نے کیفے ٹیریا میں تشدد اور توڑ پھوڑ کیا۔
اس واقعے پر پریس کلب انتظامیہ نے واقعے کی مذمت کرتے ہوئے ہنگامی اجلاس طلب کر لیا ہے۔
دوسری جانب اس حوالے سے پولیس حکام کا کہنا ہے کہ کشمیر کے لیے احتجاج کرنے والی جوائنٹ ایکشن کمیٹی کے اراکین پریس کلب کے باہر احتجاج کر رہے تھے۔
’جوائنٹ ایکشن کمیٹی کے اراکین کے خلاف کارروائی کی گئی تو ان میں سے بعض پریس کلب کی عمارت میں داخل ہو گئے جن کی گرفتاری کے لیے پولیس کو بھی وہاں جانا پڑا
صحافی برادری کی جانب سے پولیس تشدد کی ویڈیوز بھی سوشل میڈیا پر شیئر کی جا رہی ہیں جن میں پولیس کو توڑ پھوڑ اور تشدد کرتے دیکھا جا سکتا ہے۔
واقعے کے بعد وزیر مملکت برائے داخلہ طلال چوہدری نے اسلام آباد نیشنل پریس کلب کا دورہ کیا اور پریس کانفرنس کرتے ہوئے کہا کہ مجھے وزیر داخلہ محسن نقوی نے بھیجا ہے۔میں پولیس تشدد کے واقعے پر صحافیوں سے غیرمشروط معافی مانگتا ہوں۔
اس موقع پر پاکستان فیڈرل یونین آف جرنلسٹس کے صدر افضل بٹ بھی طلال چوہدری کے ہمراہ موجود تھے جنہوں نے واقعے کی مذمت کی۔
پولیس کے مطابق واقعے کی تحقیقات کی جا رہی ہیں جبکہ حراست میں لیے جانے والے افراد کی تعداد 40 سے 50 ہے۔