کوئٹہ :بلوچستان کے ضلع خضدار کے علاقے زہری میں سیکیورٹی فورسز کے آپریشن میں فتنۃ الہندوستان سے تعلق رکھنے والے 7 دہشتگرد ہلاک اور 10 زخمی ہوگئے، ہلاک دہشتگردوں سے تیار شدہ آی ای ڈیز، ٹرانسمیٹرز، امریکی ساختہ خودکار ہتھیار،گرنیڈ اور گولیاں برآمد ہوئیں، آپریشن تاحال جاری ہے۔
رپورٹ کےمطابق ضلع خضدار کے علاقے زہری میں سیکیورٹی فورسز کا خفیہ اطلاعات کی بنا پر آپریشن جاری ہے جس میں اب تک 7 دہشتگرد ہلاک اور 10 زخمی ہوئے ہیں۔
سیکیورٹی ذرائع کے مطابق زہری کے ملحقہ پہاڑوں میں فتنۃ الہندوستان کی موجودگی اور نقل و حرکت کی خفیہ اطلاعات تھیں، اور دہشتگردوں نے مقامی لوگوں کو ہراساں کرنے کا عمل بھی جاری رکھا ہوا تھا۔
سیکیورٹی ذرائع کا کہنا ہے کہ بڑھتی ہوئی دہشتگردی کے پیش نظر سیکیورٹی فورسز نے خفیہ اطلاع ملنے پر علاقے میں آپریشن کا آغاز کر دیا ہے، آپریشن میں بڑی تعداد میں گراؤنڈ فورسز اور ہیلی کاپٹرز کا استعمال بھی کیا جا رہا ہے۔