9 مئی ،قوم ماسٹر مائنڈز ، سہولت کاروں کا کڑا احتساب چاہتی ہے،عظمی بخاری

لاہور ( ) وزیر اطلاعات و ثقافت پنجاب عظمیٰ بخاری نے اپنے بیان میں کہا ہے کہ 9 مئی کو ہونے والی ریاست دشمن کارروائی ایک منظم اور ناکام بغاوت تھی، جس کے تمام شواہد قوم کے سامنے آ چکے ہیں۔ انہوں نے کہا کہ اس سازش میں ملوث عناصر اب سیاسی لبادہ اوڑھ کر خود کو نہیں چھپا سکتے۔عظمیٰ بخاری نے سوال اٹھایا کہ سیاست کی آڑ میں ریاستی اداروں پر حملہ کرنے اور شہداء کے مجسمے جلا کر کون سی قوم کی خدمت کی گئی؟ 9 مئی کے حملوں نے عالمی سطح پر پاکستان کو شرمندگی سے دوچار کیا۔انہوں نے کہا کہ اب یہ ممکن نہیں کہ ریاست دشمنی کو انتقامی سیاست کا نام دے کر خود کو مظلوم ظاہر کیا جائے۔ قوم 9 مئی کے ماسٹر مائنڈز اور سہولت کاروں کا کڑا اور مکمل احتساب چاہتی ہے۔وزیر اطلاعات پنجاب کا کہنا تھا کہ مقبولیت تو فرعون اور شیطان کی بھی تھی، مگر وہ فرشتے نہیں بن سکتے۔ 9 مئی کے مرکزی کرداروں کی تمام چالیں اور تحاریک ناکام ہو چکی ہیں، اب وقت ہے کہ وہ اپنے گناہوں کا حساب دیں۔انہوں نے واضح کیا کہ حکومت اور ادارے ریاست کے خلاف ہر سازش کو ناکام بنانے کے لیے پرعزم ہیں، اور قانون کے مطابق ہر کردار کو اس کے انجام تک پہنچایا جائے گا۔