لاہور: صوبائی وزیر اطلاعات و ثقافت پنجاب، عظمیٰ بخاری نے کہا ہے کہ 5 اگست کا دن پاکستانیوں کے دل میں بھی وہی درد اور دکھ لے کر آتا ہے جو کشمیری عوام محسوس کرتے ہیں۔ یہ دن بھارتی حکومت کی فاشسٹ سوچ اور کشمیریوں پر ڈھائے جانے والے ظلم و ستم کی یاد دلاتا ہے۔
الحمرا آرٹس کونسل لاہور میں یومِ استحصال کشمیر کی مناسبت سے منعقدہ تقریب سے خطاب کرتے ہوئے عظمیٰ بخاری نے کہا کہ کشمیریوں کی جدوجہد، قربانیاں اور استقامت یقیناً رنگ لائیں گی۔ ان کا کہنا تھا کہ کشمیری کبھی نہ جھکے ہیں اور نہ جھکیں گے، ظلم کی عمر زیادہ نہیں ہوتی اور بھارت کے ظلم کا خاتمہ قریب ہے۔
انہوں نے کہا کہ بھارت کی 7 مئی کی جارحیت کا پاکستان نے چند گھنٹوں میں منہ توڑ جواب دیا، اور آج بھارت سفارتی سطح پر تنہائی کا شکار ہے۔ ماضی میں نواز شریف اور شہباز شریف نے عالمی سطح پر کشمیریوں کا مقدمہ پوری قوت سے لڑا، اور کسی فورم پر مسئلہ کشمیر کو دبنے نہیں دیا۔
عظمیٰ بخاری نے کہا کہ خود امریکی صدر ڈونلڈ ٹرمپ بھی کشمیر کو متنازعہ علاقہ مان چکا ہے۔ اگر بھارت نے دوبارہ کوئی مہم جوئی کی، تو پاکستان پوری دنیا کے سامنے سچ لانے میں دیر نہیں کرے گا۔
انہوں نے کہا کہ جب قوم یکجہتی کا دن منا رہی ہے، تو کچھ عناصر پاکستان کے خلاف سازشوں میں مصروف ہیں۔ لیکن ریاست اتنی مضبوط ہے کہ چھ گنا بڑے دشمن کو پسپا کر سکتی ہے۔ قوم متحد ہے، اور شرپسند عناصر کبھی کامیاب نہیں ہو سکتے۔