یومِ استحصالِ کشمیر: چائلڈ پروٹیکشن بیورو میں کشمیری عوام سے یکجہتی کی خصوصی تقریب
لاہور: وزیراعلیٰ پنجاب مریم نواز کے وژن کے تحت اور چیئرپرسن چائلڈ پروٹیکشن بیورو سارہ احمد کی ہدایت پر یومِ استحصالِ کشمیر کے موقع پر خصوصی تقریب کا انعقاد کیا گیا۔
تقریب میں ڈائریکٹر جنرل چائلڈ پروٹیکشن بیورو، بیورو میں رہائش پذیر بچے اور دیگر مہمانوں نے شرکت کی۔ اس موقع پر بچوں نے کشمیر کی آزادی کے حق میں تقاریر، ملی نغمے اور جذباتی پرفارمنسز پیش کر کے شرکاء کے دل جیت لیے۔
تقریب کا مقصد کشمیری عوام سے محبت، ہمدردی اور مکمل حمایت کے جذبے کو اجاگر کرنا تھا۔ شرکاء نے بھارتی مظالم کا شکار کشمیریوں کی قربانیوں کو خراجِ تحسین پیش کیا اور ان کے حقِ خودارادیت کی حمایت کی۔
اس موقع پر بچوں کی جانب سے کشمیری بہن بھائیوں کی سلامتی، آزادی اور امن کے لیے خصوصی دعائیں بھی کی گئیں۔
چیئرپرسن سارہ احمد نے اپنے پیغام میں کہا کہ "ہمیں اپنے بچوں کو کشمیری عوام سے محبت اور یکجہتی کے جذبے سے روشناس کرانا ہے تاکہ وہ بڑے ہو کر مظلوموں کی آواز بن سکیں۔”