سیالکوٹ ۔سلیم احمد اعوان شیخو
فیڈرل انویسٹیگیشن ایجنسی۔ایف آئی اے۔ نے گیپکو سب ڈویژن ہیڈ مرالہ کے ایگزیکٹو انجینئر ۔ایکسیئن۔کو گرفتار کر کے علاقہ مجسٹریٹ کی عدالت سے دو دن کا جسمانی ریمانڈ لے لیا۔بتایا گیا ہے کہ سیالکوٹ کے علاقہ کلو وال کے رہائشی محمد الیاس ولد صدیق اعوان نے فیڈرل انویسٹیگیشن ایجنسی ۔ایف آئی اے۔کو ایک درخواست دیتے ہوئے یہ موقف اختیار کیا کہ ایک رہائشی ٹاؤن دیوا ٹاؤن کے مالک حسن مراد کو بجلی کی ترسیل کے لئے جو تاریں نصب کی گئی ہیں وہ اس کے گھر کی چھت سے گزار کر نصب کی گئی ہیں اور اس سلسلہ میں اس نے گیپکو واپڈا کے ایکسیئن سٹی عبدالقیوم گورائی سمیت ایس ڈی او عبدالجمال ناصر لائن سپرنٹنڈنٹ ملک مسعود علی ناصر اور لائن مین شوکت علی و محمد شفیق کو کئی بار باور کروایا لیکن ان کے کان پر یوں تک نہ رینگی جبکہ محمد الیاس کا تقریباً ساڑھے 7 سالہ بچہ عثمان مذکورہ نصب شدہ تاروں میں کرنٹ آنے سے جھلس کر مر گیا۔ایف آئی اے کی ٹیم نے باقاعدہ نصب شدہ تاروں کا معائنہ کرنے اور بچے کی موت کی تصدیق کرنے کے مقدمہ درج کر لیا تو ایکسیئن نے لاہور ہائی کورٹ سے قبل از گرفتاری ضمانت کروائی جو کہ خارج ہوگئی تو ایف آئی اے ٹیم نے ایکسیئن کو گرفتار کر کے علاقہ مجسٹریٹ عمادالدین کی عدالت میں پیش کیا تو فاضل مجسٹریٹ نے ایکسئین کا دو روزہ جسمانی ریمانڈ دے دیا ۔