اسلام آباد: پاکستان کی کامیاب اور فعال سفارتی کوششوں کے نتیجے میں امریکا اور ایران کے درمیان کشیدگی میں کمی کی جانب ایک بڑی پیش رفت سامنے آئی ہے۔ انادولو ایجنسی نے حکومتی ذرائع کے حوالے سے رپورٹ کیا ہے کہ دونوں ممالک نے اسلام آباد میں طے پانے والی مفاہمتی یادداشت (ایم او یو) کے تحت 60 روزہ مہلت ختم ہونے سے قبل جنگ بندی کی مدت میں توسیع پر باضابطہ اتفاق کر لیا ہے۔
📌 US, Iran agree to extend 60-day ceasefire, Pakistani sources tell Anadolu
🤝 Both sides have reportedly agreed in principle to extend the ceasefire, with the duration of the extension still under discussion
📅 The current Islamabad Memorandum of Understanding is set to… pic.twitter.com/0X7NpPkrGl
— Anadolu English (@anadoluagency) August 12, 2026
یہ اہم پیش رفت وزیرِ داخلہ محسن نقوی کے دورہِ تہران کے دوران سامنے آئی، جہاں انہوں نے ایرانی قیادت کو وزیرِ اعظم شہباز شریف اور آرمی چیف فیلڈ مارشل سید عاصم منیر کا خصوصی و اہم پیغام پہنچایا۔ ملاقات کے دوران محسن نقوی نے اپنے ایرانی ہم منصب کو آگاہ کیا کہ فیلڈ مارشل عاصم منیر خطے میں پائیدار امن کے قیام کے لیے امریکا، ایران اور خلیجی ممالک کے رہنماؤں کے ساتھ مسلسل رابطے میں ہیں۔
اس سے قبل منگل کے روز وزیرِ دفاع خواجہ آصف نے ‘بلومبرگ نیوز’ کو دیے گئے ایک انٹرویو میں عندیہ دیا تھا کہ واشنگتن اور تہران ایک ایسے عبوری بندوبست یا معاہدے کے انتہائی قریب پہنچ چکے ہیں جس سے عالمی توانائی کی منڈیوں پر پڑنے والے منفی اثرات اور کشیدگی میں خاطر خواہ کمی آئے گی۔ ان کا کہنا تھا کہ گزشتہ چند روز کے دوران سامنے آنے والے اشارے اور سفارتی اشارے اسی سمت اشارہ کرتے ہیں کہ معاملات ایک بار پھر امن معاہدے یا کسی پائیدار ڈیل کی طرف گامزن ہیں۔
واضح رہے کہ رواں سال 28 فروری کو امریکا اور اسرائیل کی جانب سے ایران پر ہونے والے حملوں اور اس کے بعد پیدا ہونے والے جوابی تنازع کے بعد سے خطے میں شدید بحران پیدا ہو گیا تھا، جس کے بعد پاکستان نے تناؤ کو کم کرنے کے لیے ثالثی کا انتہائی فعال اور کلیدی کردار ادا کیا۔ اسلام آباد کی ان امن کوششوں کو چین، سعودی عرب، ترکیہ، مصر اور اقوام متحدہ سمیت عالمی و علاقائی سطح پر بھرپور پذیرائی اور سراہا گیا ہے۔