تحریر :ریاض ابوالخیل
جہاں لفظ بے نقاب ہوں۔۔۔ وہیں سے سچ کا آغاز ہوتاہے
کوئٹہ کی کوئلہ کان میں ہونے والا ہولناک دھماکہ صرف ایک حادثہ نہیں، بلکہ درجنوں گھروں کی خوشیاں نگل جانے والا ایسا المیہ بن گیا ہے جس نے پورے شانگلہ کو سوگ میں ڈبو دیا ہے۔ غیر سرکاری اطلاعات کے مطابق جاں بحق ہونے والے 37 افراد میں سے 27 کا تعلق ضلع شانگلہ سے بتایا جا رہا ہے، جبکہ یہ دل چیر دینے والی اطلاع بھی سامنے آئی ہے کہ شہداء میں چار سگے بھائی بھی شامل ہیں۔
شانگلہ کی فضائیں آہوں، سسکیوں اور بین سے گونج رہی ہیں۔ ہر گلی ماتم کدہ بنی ہوئی ہے، ہر دروازے پر غم کی چادر تنی ہے اور ہر آنکھ اپنے پیاروں کی جدائی میں اشکبار ہے۔ ماؤں کی آہیں، بہنوں کی سسکیاں، بچوں کی بے بسی اور بزرگوں کی خاموش دعائیں اس سانحے کی شدت کا دردناک منظر پیش کر رہی ہیں۔ پورا شانگلہ غم کی ایسی کیفیت سے گزر رہا ہے جس نے ہر دل کو رنج و الم میں مبتلا کر دیا ہے۔