لاہور: پاکستان کی آٹو موبائل مارکیٹ میں برقی اور ہائبرڈ گاڑیوں کا رجحان بڑھتا جا رہا ہے اور اب اس فہرست میں ایک اور بڑا اضافہ متوقع ہے۔ عارف حبیب لمیٹڈ (AHL) کے ‘اپ کمنگ آٹوموبائل لانچ ٹریکر’ کے مطابق، ہیول ایس یو وی بنانے والی کمپنی گریٹ وال موٹرز (GWM) جون 2026 میں اپنی جدید ترین پلگ ان ہائبرڈ پک اپ ٹرک ”کینن الفا’ (Cannon Alpha) پاکستان میں لانچ کرنے جا رہی ہے۔
‘کینن الفا’ کو ایک پریمیم لائف اسٹائل پک اپ کے طور پر ڈیزائن کیا گیا ہے، جو اپنی طاقتور کارکردگی اور جدید خصوصیات کی بدولت آٹو مارکیٹ میں ہلچل مچانے کے لیے تیار ہے۔
شاندار پاور اور کارکردگی
بین الاقوامی تفصیلات کے مطابق، اس گاڑی میں 2.0 لیٹر ٹربو چارجڈ پیٹرول انجن کے ساتھ ایک طاقتور الیکٹرک موٹر اور بیٹری کا امتزاج دیا گیا ہے۔ یہ ہائبرڈ پاور ٹرین 300 کلو واٹ مشترکہ پاور اور 750 نیوٹن میٹر کا زبردست ٹارک پیدا کرتی ہے، جسے 9 اسپیڈ ہائبرڈ آٹومیٹک ٹرانسمیشن اور فور وہیل ڈرائیو سسٹم کے ذریعے پہیوں تک پہنچایا جاتا ہے۔
سنگل چارج پر 1000 کلومیٹر سے زائد کی رینج
اس پک اپ کی سب سے نمایاں خصوصیت اس کی الیکٹرک ڈرائیونگ صلاحیت ہے۔ عالمی اسپیکس کے مطابق، یہ گاڑی صرف بیٹری پر 115 کلومیٹر تک کا سفر کرنے کی صلاحیت رکھتی ہے، جبکہ مجموعی طور پر یہ 1,000 کلومیٹر سے زائد کا سفر طے کر سکتی ہے۔ یہ گاڑی ڈی سی فاسٹ چارجنگ کو بھی سپورٹ کرتی ہے۔
لگژری اور جدید سیفٹی فیچرز
گاڑی کا اندرونی حصہ کسی لگژری گاڑی سے کم نہیں، جس میں ایک بڑا انفوٹینمنٹ ڈسپلے، ڈیجیٹل انسٹرومنٹ کلسٹر، وائرلیس اسمارٹ فون کنیکٹیویٹی، پینورامک سن روف اور پاورڈ فرنٹ سیٹیں شامل ہیں۔ حفاظت کے معاملے میں بھی یہ گاڑی کسی سے پیچھے نہیں؛ اس میں اڈاپٹیو کروز کنٹرول، ایمرجنسی بریکنگ، لین کیپنگ اسسٹ، ڈرائیور مانیٹرنگ اور 360 ڈگری کیمرہ جیسے جدید فیچرز موجود ہیں۔ یاد رہے کہ بین الاقوامی سطح پر اس گاڑی نے ANCAP کی جانب سے 5 اسٹار سیفٹی ریٹنگ حاصل کی ہے۔
اگرچہ گریٹ وال موٹرز کی جانب سے ابھی تک مقامی قیمت اور پاکستان کے لیے مخصوص تفصیلات کا باقاعدہ اعلان نہیں کیا گیا، لیکن جون 2026 میں اس گاڑی کی آمد کو مارکیٹ کا ایک اہم ترین ایونٹ قرار دیا جا رہا ہے۔
پاکستان میں آٹو موبائل کا نیا انقلاب: گریٹ وال موٹرز کا ‘کینن الفا’ ہائبرڈ پک اپ ٹرک متعارف
