ٹورنٹو: کینیڈا کی تاریخ میں پہلی بار ڈیجیٹل دہشت گردی کا ایک ایسا ہولناک منصوبہ بے نقاب ہوا ہے جس نے پورے ملک میں خوف و ہراس پھیلا دیا ہے۔ ٹورنٹو پولیس نے ایک ایسے گروہ کو گرفتار کیا ہے جو گاڑیوں میں چھپے مخصوص آلات (SMS Blasters) کے ذریعے سڑکوں پر گھومتے ہوئے شہریوں کے موبائل فونز ہیک کر رہا تھا۔
پولیس حکام کے مطابق اس مجرمانہ کارروائی کے دوران 13 ملین (ایک کروڑ 30 لاکھ) نیٹ ورک خلل ریکارڈ کیے گئے۔ ان آلات نے نہ صرف ہزاروں شہریوں کا ڈیٹا چوری کیا بلکہ سب سے تشویشناک بات یہ ہے کہ متاثرہ فونز سے ایمرجنسی سروس 911 پر کال کرنا بھی ناممکن بنا دیا گیا تھا، جس سے انسانی جانوں کو شدید خطرہ لاحق ہو گیا۔
ایس ایم ایس بلاسٹر (SMS Blaster) کیسے کام کرتا ہے؟
یہ مشین ایک چھوٹے موبائل ٹاور کی طرح کام کرتی ہے جو گاڑی کی پچھلی نشست پر چھپا دی جاتی ہے۔
• سگنل ہائی جیکنگ: یہ آلہ اصلی موبائل ٹاور سے زیادہ طاقتور سگنل بھیجتا ہے، جس کی وجہ سے قریبی موبائل فون خود بخود اس ’جعلی ٹاور‘ سے جڑ جاتے ہیں۔
• جعلی پیغامات: جیسے ہی فون اس سے جڑتا ہے، لٹیرے بینکوں، ٹیکس ڈیپارٹمنٹ یا سرکاری اداروں کے نام سے جعلی ٹیکسٹ میسجز بھیجتے ہیں۔
• سمشنگ (Smishing): ان پیغامات میں موجود لنکس پر کلک کرتے ہی صارف کا ڈیٹا چوری ہو جاتا ہے یا ان کے اکاؤنٹ سے رقم نکلوا لی جاتی ہے۔
ٹورنٹو پولیس کے ڈپٹی چیف رابرٹ جانسن نے اسے عوامی تحفظ کے لیے ایک بڑا چیلنج قرار دیا ہے۔ اس سے قبل فلپائن میں بھی ایسے ہی آلات کے ساتھ چینی باشندوں کو گرفتار کیا گیا تھا جو فوجی اڈوں اور امریکی سفارت خانے کے قریب مشکوک سرگرمیوں میں ملوث تھے۔ ماہرین کا کہنا ہے کہ یہ آلات (IMSI catchers) فون کالز ریکارڈ کرنے اور ڈیوائس کی لوکیشن ٹریس کرنے کی صلاحیت بھی رکھتے ہیں۔
خود کو کیسے محفوظ رکھیں؟
اگرچہ پولیس نے اس مخصوص گروہ کو پکڑ لیا ہے، مگر خطرہ ابھی ٹلا نہیں ہے۔ شہریوں کو درج ذیل احتیاطی تدابیر اختیار کرنے کی ضرورت ہے:
1. مشکوک لنکس سے بچیں: اگر کسی میسج میں بینک یا سرکاری ادارے کے نام سے لنک آئے، تو اس پر کلک کرنے کے بجائے براہِ راست متعلقہ ادارے کی آفیشل ایپ یا ویب سائٹ استعمال کریں۔
2. نمبر چیک کریں: اگر پیغام کسی فون نمبر کے بجائے براہِ راست کسی ادارے کے نام سے آئے تو زیادہ محتاط رہیں۔
3. نیٹ ورک غائب ہونا: اگر اچانک آپ کے فون کے سگنل غائب ہو جائیں یا نیٹ ورک میں غیر معمولی تبدیلی آئے، تو فوری طور پر ہوشیار ہو جائیں۔
پولیس نے سکیورٹی وجوہات کی بنا پر پکڑے گئے آلات کی تصاویر جاری نہیں کی ہیں کیونکہ یہ خاص طور پر تیار کیے گئے تھے۔ شہریوں سے اپیل کی گئی ہے کہ وہ ڈیجیٹل دنیا میں کسی بھی پیغام پر آنکھیں بند کر کے بھروسہ نہ کریں۔
ہوشیار! آپ کے برابر سے گزرتی گاڑی آپ کا بینک اکاؤنٹ خالی کر سکتی ہے: کینیڈا میں ’ایس ایم ایس بلاسٹر‘ گینگ پکڑا گیا، 13 ملین فون متاثر!
