لندن :بین الاقوامی ہوابازی کے نگراں ادارے ’انٹرنیشنل ایئر ٹرانسپورٹ ایسوسی ایشن‘ (آئی اے ٹی اے) نے سوئس پاکستانی نژاد ماہرِ معاشیات سعدیہ زاہدی کو ادارے کے بورڈ آف ڈائریکٹرز کی منظوری کے بعد نیا ڈائریکٹر جنرل تعینات کرنے کا اعلان کر دیا ہے۔
واضح رہے کہ آئی اے ٹی اے دنیا بھر کی 370 سے زائد ایئرلائنز کی نمائندگی کرتی ہے، جو کہ عالمی فضائی ٹریفک کا تقریباً 85 فیصد حصہ بنتی ہے۔ یہ تنظیم عالمی سطح پر محفوظ، موثر اور پائیدار فضائی نقل و حمل کے فروغ کے لیے کوشاں رہتی ہے۔
سعدیہ زاہدی کون ہیں؟
سعدیہ زاہدی یکم نومبر سے اپنی نئی ذمہ داریاں سنبھالیں گی، اور وہ اس مؤقر عہدے پر فائز ہونے والی تاریخ کی نویں اور پہلی خاتون ڈائریکٹر جنرل ہوں گی۔ وہ اس سے قبل عالمی اقتصادی فورم (WEF) میں بطور منیجنگ ڈائریکٹر اور منیجنگ بورڈ کی رکن کے طور پر فرائض انجام دے رہی تھیں۔تعلیم کے میدان میں، سعدیہ زاہدی نے ’سمتھ کالج‘ سے اکنامکس میں بی اے، جنیوا کے ’دی گریجویٹ انسٹی ٹیوٹ‘ سے انٹرنیشنل اکنامکس میں ایم فل اور معروف ہارورڈ یونیورسٹی سے پبلک ایڈمنسٹریشن میں ماسٹرز (ایم پی اے) کی ڈگری حاصل کی ہے۔ ڈبلیو ای ایف میں اپنے طویل کیریئر کے دوران وہ ’سینٹر فار نیو اکانومی اینڈ سوسائٹی‘ کی بانی سربراہ رہنے کے علاوہ عالمی سطح پر پالیسی سازی، مواصلات اور سول سوسائٹی کے امور کی قیادت بھی کر چکی ہیں۔ اس کے علاوہ وہ اقوام متحدہ کے سیکرٹری جنرل کے خواتین کی اقتصادی بااختیاریت سے متعلق پینل اور یورپی خلائی ایجنسی کے اعلیٰ سطحی مشاورتی گروپ کا بھی حصہ رہ چکی ہیں۔
اپنی تقرری پر ردعمل ظاہر کرتے ہوئے سعدیہ زاہدی نے کہا کہ عالمی ہوابازی کی صنعت کی نمائندگی اور خدمت کرنے کے اس اہم مشن کا حصہ بننا ان کے لیے باعثِ فخر و اعزاز ہے۔ انہوں نے اس عزم کا اظہار کیا کہ موجودہ بدلتی ہوئی دنیا میں تجارت، سیاحت، معاشی ترقی اور روزگار کے مواقع پیدا کرنے کے لیے ہوابازی ایک ناگزیر بنیادی ڈھانچہ ہے، اور وہ ممبر ایئرلائنز، حکومتوں اور شراکت داروں کے ساتھ مل کر اس صنعت کو پائیدار ترقی، جدت اور بہتر رابطوں کی راہ پر گامزن رکھنے کے لیے بھرپور کام کریں گی۔
سوئس پاکستانی سعدیہ زاہدی انٹرنیشنل ایئر ٹرانسپورٹ ایسوسی ایشن (IATA) کی پہلی خاتون ڈائریکٹر جنرل مقرر
