کراچی:پاکستان اسٹاک ایکسچینج (PSX) میں جمعرات کے روز تیزی کا رجحان برقرار رہا اور بینچ مارک KSE-100 انڈیکس میں 2,837 پوائنٹس کا بڑا اضافہ ریکارڈ کیا گیا۔ کاروباری دن کے اختتام پر انڈیکس 178,124 پوائنٹس کی سطح پر پہنچ گیا ہے۔ یاد رہے کہ گزشتہ روز بھی مارکیٹ 1,767 پوائنٹس اضافے کے ساتھ بند ہوئی تھی۔
اس تیزی سے قبل رواں ہفتے کے ابتدائی دو دنوں میں اسٹاک مارکیٹ شدید دباؤ کا شکار تھی، جس کے دوران انڈیکس میں مجموعی طور پر 8,000 سے زائد پوائنٹس کی کمی دیکھی گئی تھی۔ اس گراوٹ کی بنیادی وجہ امریکہ اور ایران کے درمیان بڑھتی ہوئی کشیدگی اور آبنائے ہرمز کی ممکنہ بندش کے خدشات تھے، جس کے باعث عالمی منڈی میں تیل کی قیمتوں میں اچانک تیزی آئی تھی۔ تاہم، مارکیٹ نے گزشتہ دو دنوں میں شاندار ریکوری کرتے ہوئے سرمایہ کاروں کا اعتماد بحال کیا ہے۔
مارکیٹ کے ماہرین اس تیزی کو "کریکشن” اور مثبت توقعات کا نتیجہ قرار دے رہے ہیں۔ تجزیہ کار جبران سرفراز کا کہنا ہے کہ اسٹاک مارکیٹ میں لسٹڈ کمپنیاں جلد اپنے مالیاتی نتائج کا اعلان کرنے والی ہیں، اور سرمایہ کار بہتر نتائج کی توقع میں حصص کی خریداری کر رہے ہیں۔ انہوں نے مزید کہا کہ حالیہ بڑی گراوٹ کے باعث حصص کی قیمتیں کافی کم ہو گئی تھیں، جس نے "ویلیو بائنگ” (Value Buying) کے مواقع پیدا کیے اور سرمایہ کاروں نے ان کم قیمت شیئرز میں دوبارہ دلچسپی ظاہر کی، جس سے مارکیٹ کو سنبھلنے میں مدد ملی۔
اسٹاک مارکیٹ کی شاندار واپسی؛ ہنڈرڈ انڈیکس میں 2837 پوائنٹس کا بڑا اضافہ
