لاہور:وزیراعلی پنجاب مریم نواز کے صاحبزادے جنید صفدر کا شانزے روحیل کے ساتھ نکاح ہوگیا ہے اور ان کی شادی کی تقریبات جاری ہیں۔چیئرمین اسلامی نظریاتی کونسل علامہ راغب نعیمی نے جنید صفدر اور شانزے روحیل کا نکاح پڑھایا،قبل ازیں وزیراعلی پنجاب مریم نواز کے بیٹے جنید صفدر بارات لے کر دلہنیا کے گھر پہنچے، جہاں ان کا استقبال کیا گیا۔
بارات لاہور کی ایک نجی ہاسنگ سوسائٹی میں داخل ہوئی، جہاں سابق وزیراعظم نواز شریف، وزیراعظم شہباز شریف، وزیراعلی مریم نواز، اہل خانہ کے افراد، ساتھ ہی وفاقی اور صوبائی وزرا اور ملکی و غیر ملکی مہمان بھی شریک تھے۔جنید صفدر نے اپنی شادی کے موقع پر معروف ڈیزائنر حسن شہریز یاسین کا تیار کردہ لباس زیب تن کیا۔
جنید صفدر نے آف وائٹ رنگ کی خصوصی طور پر تیار کی گئی شیروانی پہنی جس میں ابھرا ہوا اسکلپٹڈ کالر اور نفیس بٹن ورک نمایاں تھا۔ اس لباس کے ساتھ روایتی پگڑی اور کاٹن شلوار قمیص کا امتزاج اختیار کیا گیا، جس نے مجموعی انداز کو وقار اور سادگی کا حسین امتزاج بنا دیا۔ دلہا دلہن کے ساتھ مریم نواز بھی سنہری لباس میں نمایاں نظر آئیں، تقریب میں سبز رنگ کے تھیم کے مطابق خوبصورت سجاوٹ کی گئی تھی۔
جنید صفدر کے ولیمے کی تقریب کل جاتی عمرا میں ہو گی۔
