راولپنڈی :پاکستان کی بحریہ نے منگل کے روز مقامی طور پر تیار کردہ بحری جہاز شکن بیلسٹک میزائل کا کامیاب تجربہ کیا ہے۔
چیف آف دی نیول اسٹاف، سینیئر سائنسدانوں اور انجینئرز نے اس تجربے کا مشاہدہ کیا۔
پاکستان کے سرکاری میڈیا اے پی پی کے مطابق، ڈائریکٹر جنرل پبلک ریلیشنز (بحریہ) کی جانب سے جاری کردہ ایک بیان میں کہا گیا ہے ہتھیاروں کا یہ نظام انتہائی درستگی کے ساتھ سمندری اور زمینی اہداف کو نشانہ بنانے کی صلاحیت رکھتا ہے۔
بیان کے مطابق، یہ نظام جدید ترین رہنمائی اور موثر نقل وحرکت کی خصوصیات سے لیس ہے اور یہ تجربہ پاکستان کی تکنیکی مہارت اور قومی مفادات کے تحفظ کے لیے پاکستان بحریہ کے غیر متزلزل عزم کا منہ بولتا ثبوت ہے۔