لاہور:معروف اداکارہ مومنہ اقبال کو ہراساں کرنے کے الزام میں ایم پی اے ثاقب چدھڑ کے خلاف مقدمہ درج کر لیا گیا ہے۔ تاہم داکارہ مومنہ اقبال کو ہراساں کرنے کے مقدمہ میں ایم پی اے ثاقب چدھڑ کی عبوری ضمانت منظورکرلی گئی۔
نجی ٹی وی چینل دنیا نیوز کے مطابق عدالت نے 24جون تک ثاقب چدھڑ کو گرفتار کرنے سے روک دیا۔یادرہے کہ اداکارہ مومنہ اقبال کو مبینہ ہراساں کرنے کے کیس میں رکن پنجاب اسمبلی ثاقب چدھڑ کیخلاف پیکاایکٹ کے تحت مقدمہ درج کیا گیا تھا،مقدمہ مومنہ اقبال کی مدعیت میں این سی سی آئی اے میں درج کیا تھا۔
نیشنل سائبر کرائم انویسٹی گیشن ایجنسی (NCCIA) نے اداکارہ کی شکایت پر کارروائی کرتے ہوئے ملزم کے خلاف کارروائی کی تھی۔
اداکارہ مومنہ اقبال نے ایف آئی اے کو دی گئی اپنی شکایت میں مؤقف اختیار کیا کہ ملزم ثاقب چدھڑ، جو ایم پی اے تھا، نے شادی کی پیشکش مسترد کیے جانے کے بعد سے ان کا جینا دوبھر کر دیا تھا۔ ملزم پر الزامات ہیں کہ اس نےاداکارہ کو دھمکی آمیز پیغامات بھیجے۔ان کی مبینہ نازیبا ویڈیوز اور نجی معلومات ان کی رضامندی کے بغیر دیگر افراد میں وائرل کیں جبکہ اداکارہ کی غیر قانونی نگرانی (Surveillance) کی اور انہیں جان سے مارنے کی دھمکیاں دیں۔
این سی سی آئی اے کے حکام کا کہنا ہے کہ ابتدائی تحقیقات اور تکنیکی تجزیے کے دوران ملزم کے خلاف ٹھوس شواہد ملے ہیں۔ شکایت کنندہ اور دیگر گواہوں کے بیانات قلمبند کرنے کے بعد ملزم کے موبائل فون، ڈیجیٹل آلات اور دیگر ڈیٹا کو فرانزک جانچ کے لیے بھجوا دیا گیا ہے۔ مقدمہ پیکا ایکٹ 2016 (ترمیمی 2025) کی مختلف دفعات کے تحت درج کیا گیا ہے۔