کمپالا: یوگنڈا نے پڑوسی ملک کانگو میں ایبولا کے بڑھتے ہوئے کیسز اور اپنے ہاں بھی وائرس کے پھیلاؤ کے خدشے کے پیشِ نظر کانگو کے ساتھ اپنی تمام سرحدیں فوری طور پر بند کرنے کا حکم دے دیا ہے۔
حکام کا کہنا ہے کہ یہ فیصلہ ایبولا کی ایک نایاب قسم (Bundibugyo) کے پھیلاؤ کو روکنے کے لیے کیا گیا ہے، جس کے لیے تاحال کوئی منظور شدہ دوا یا ویکسین دستیاب نہیں ہے۔ کانگو میں اس وائرس سے مشتبہ کیسز کی تعداد 1000 کے قریب پہنچ چکی ہے، جبکہ 220 سے زائد افراد ہلاک ہو چکے ہیں۔
یوگنڈا کی وزارتِ صحت کی مستقل سیکریٹری ڈاکٹر ڈیانا ایٹوین نے صحافیوں کو بتایا کہ سرحد اب صرف ہنگامی طبی امداد، امدادی سامان اور سیکورٹی وجوہات کی بنا پر کھلی رہے گی۔ تاہم، سرحد عبور کرنے والے ہر فرد کے لیے 21 دن تک لازمی ‘سیلف آئسولیشن’ (قرنطینہ) میں رہنا ہوگا۔
عالمی ادارہ صحت (WHO) کا موقف ہے کہ سرحدوں کی بندش سے غیر قانونی راستوں کا استعمال بڑھے گا، جس سے بیماری کا پھیلاؤ رکنے کے بجائے مزید بڑھ سکتا ہے۔ یوگنڈا اور کانگو کے درمیان سرحد سینکڑوں میل طویل ہے اور اس پر درجنوں ایسے کچے راستے ہیں جن کی نگرانی کرنا ناممکن ہے۔
کانگو میں جاری یہ وبا صحت کے حکام کے قابو سے باہر ہوتی جا رہی ہے، جہاں مسلح گروہوں کی موجودگی، نقل مکانی کرنے والے افراد کی بڑی تعداد اور خستہ حال انفراسٹرکچر نے صورتحال کو مزید سنگین بنا دیا ہے۔ مقامی سطح پر لوگ طبی عملے پر شکوک و شبہات رکھتے ہیں، جس کے باعث کلینکس پر حملوں کے واقعات بھی رپورٹ ہوئے ہیں۔
ادھر یوگنڈا میں ایبولا کے اب تک 7 کیسز رپورٹ ہو چکے ہیں۔ حکام نے عوام سے اپیل کی ہے کہ وہ اجتماعات سے گریز کریں اور احتیاطی تدابیر اختیار کریں۔ ڈاکٹر ڈیانا ایٹوین نے عوامی اجتماعات، بالخصوص انگلش پریمیئر لیگ کی جیت کے جشن میں لوگوں کے ہجوم پر شدید برہمی کا اظہار کرتے ہوئے خبردار کیا ہے کہ اس طرح کی لاپرواہی وائرس کو تیزی سے پھیلا سکتی ہے۔
عالمی امدادی گروپوں نے تنبیہ کی ہے کہ پچھلے سال امیر ممالک اور امریکہ کی جانب سے دی جانے والی امداد میں کٹوتی کے باعث وہ ایبولا سے لڑنے کے لیے ضروری حفاظتی سامان، جیسے فیس شیلڈز، حفاظتی سوٹس، ٹیسٹنگ کٹس اور میت کے لیے خصوصی بیگز کی شدید کمی کا شکار ہیں۔
یوگنڈا اور کانگو دونوں ممالک کے عوام اور طبی عملہ اس وقت ایک ایسے خوفناک بحران کا سامنا کر رہے ہیں جہاں بیماری اور غربت، دونوں ہی ان کی بقا کے لیے خطرہ بن چکے ہیں
ایبولا کا خطرہ: یوگنڈا نے کانگو سے ملحقہ سرحد فوری طور پر بند کر دی
