لاہور : وزیرِ اطلاعات پنجاب عظمیٰ بخاری نے یومِ پاکستان کے پرمسرت موقع پر قوم کے نام اپنے خصوصی پیغام میں کہا ہے کہ 23 مارچ کا دن دراصل ”عہدِ تحفظِ پاکستان“ کے عزم کی تجدید کا دن ہے۔
صوبائی وزیر نے اپنے بیان میں تحریکِ پاکستان کے اکابرین کو خراجِ عقیدت پیش کرتے ہوئے کہا کہ یہ دن ہمیں اپنے آباؤ اجداد کے مضبوط ارادوں اور ان کی انتھک جدوجہد کی یاد دلاتا ہے۔ انہوں نے واضح کیا کہ یومِ پاکستان اس عظیم نظریاتی سفر کی بنیاد ہے جس کی بدولت ہمیں محض سات سال کی مختصر مگر کٹھن جدوجہد کے بعد ایک آزاد اور خودمختار وطن حاصل ہوا۔
عظمیٰ بخاری نے کہا کہ آج ہم قائداعظم محمد علی جناح، علامہ اقبال اور ان کے جری رفقاء کی لازوال قربانیوں کی بدولت ایک آزاد فضا میں سانس لے رہے ہیں۔ انہوں نے پاکستان کی دفاعی صلاحیتوں کا ذکر کرتے ہوئے کہا کہ 1940 میں جس پاکستان کا خواب دیکھا گیا تھا، آج وہ دفاعی لحاظ سے دنیا کے نقشے پر ایک ناقابلِ تسخیر قوت بن چکا ہے۔
مسلم لیگ (ن) کے قائد کا ذکر کرتے ہوئے انہوں نے کہا کہ میاں نواز شریف نے ملک کے دفاع کو ناقابلِ تسخیر بنانے میں کلیدی کردار ادا کیا، جس کی بدولت آج پاکستان دشمن کو دھول چٹانے کی بھرپور طاقت رکھتا ہے۔
صوبائی وزیرِ اطلاعات نے پاک فوج کی خدمات کو سراہتے ہوئے کہا کہ ہماری مسلح افواج ارضِ پاک کے ایک ایک انچ کی حفاظت کے لیے ہمہ وقت تیار ہیں اور ملکی سلامتی و تحفظ پر کسی قسم کا کوئی سمجھوتہ نہیں کیا جائے گا۔