نئی دہلی: ویب ڈیسک
بھارت میں ایک انتہائی نایاب اور حیران کن طبی واقعہ سامنے آیا ہے، جہاں ایک 16 سالہ لڑکے کی بائیں آنکھ کے بالائی حصے (اوپری خانے) میں دانت اگ آیا۔ طبی ماہرین نے اس کیس کو اپنی نوعیت کا پہلا اور منفرد ترین واقعہ قرار دیا ہے۔رپورٹس کے مطابق لڑکا بائیں آنکھ کے اوپر بغیر کسی درد کے سوجن کی شکایت لے کر اسپتال پہنچا۔ کچھ عرصے بعد اس کی بھنوؤں اور پلک کے درمیان کی جلد سے دو سخت اور سفید نوکیں باہر نکلتی دکھائی دیں، جس پر ڈاکٹروں نے فوری طور پر اس کا تفصیلی طبی معائنہ اور سی ٹی اسکین کروایا۔ اسکین کے نتائج دیکھ کر ڈاکٹر دنگ رہ گئے، کیونکہ آنکھ کے خانے کے بالائی حصے میں ایک مکمل دانت موجود پایا گیا۔ماہرینِ طب کا کہنا ہے کہ میڈیکل سائنس کی تاریخ میں اس طرح کے کیسز کو "ایٹوپک ٹوتھ” (Ectopic Tooth) کہا جاتا ہے، جو عموماً منہ کے اندر (جیسے ناک یا تالو میں) تو پائے جاتے ہیں، لیکن آنکھ کے مدار (Orbital cavity) میں دانت کا بننا انتہائی غیر معمولی ہے۔ ڈاکٹروں کے مطابق اس قسم کی طبی پیچیدگی عام طور پر جنین کی نشوونما (Embryonic Development) کے دوران کسی خلل یا چہرے کی ہڈیوں کی غیر معمولی تشکیل کی وجہ سے رونما ہوتی ہے۔