جیکب آبادبیورو رپورٹ
جیکب آباد سے رائیونڈ جانے والی مسافر کوچ تنگوانی کے قریب الٹ گئی، ڈرائیور سمیت 10 سے زائد مسافر جاں بحق، متعدد زخمی، مزید ہلاکتوں کا خدشہ، مختلف اسپتالوں میں ایمرجنسی نافذ، سیکڑوں افراد جائے حادثہ پر پہنچ گئے، زخمیوں اور لاشوں کو باہر نکالنے میں مدد کی گئی۔
تفصیلات کے مطابق جیکب آباد کی تحصیل ٹھل سے رائیونڈ اجتماع کے لیے جانے والی تبلیغی جماعت کی مسافر کوچ تنگوانی کے قریب سوکڑ اسٹاپ پر تیز رفتاری کے باعث اچانک بے قابو ہوکر الٹ گئی، جس کے نتیجے میں 10 سے زائد مسافر جاں بحق جبکہ متعدد زخمی ہوگئے۔ حادثے کے بعد ضلع کے مختلف اسپتالوں میں ایمرجنسی نافذ کردی گئی۔ پولیس کے مطابق حادثہ تنگوانی ڈیرہ سرکی تھانے کی حدود میں ٹھل-کندھکوٹ انڈس ہائی وے پر پیش آیا، جہاں ٹھل سے رائیونڈ اجتماع کے لیے جانے والی مسافر کوچ نمبر 4488 JB تیز رفتاری کے باعث بے قابو ہوکر الٹ گئی۔
حادثے کی اطلاع ملتے ہی علاقہ مکینوں، پولیس اور امدادی ٹیموں نے ریسکیو آپریشن شروع کردیا، جبکہ زخمیوں کو فوری طور پر قریبی اسپتالوں منتقل کیا گیا۔ حادثے کی شدت کے باعث مختلف اسپتالوں میں ایمرجنسی نافذ کردی گئی۔
پولیس کے مطابق حادثے میں جاں بحق ہونے والوں میں بیدل مغيری، نور محمد پھوڑ، حامد پھوڑ، محمد امین سرکی، فیض محمد بڑو اور غلام سرور مغيری شامل ہیں، جبکہ کوچ کا ڈرائیور سرور مغيری بھی حادثے میں جاں بحق ہوگیا۔
حادثے میں جاں بحق افراد کی تعداد 10 سے تجاوز کرنے کا خدشہ ظاہر کیا جارہا ہے، جبکہ متعدد زخمی مختلف اسپتالوں میں زیرِ علاج ہیں۔ جاں بحق اور زخمی ہونے والے دیگر افراد کی مکمل شناخت سے متعلق مزید تفصیلات سامنے آنے کا انتظار ہے۔ حادثے کے باعث علاقے میں غم اور سوگ کی لہر دوڑ گئی، جبکہ حادثے کی اصل وجوہات معلوم کرنے کے لیے پولیس نے تحقیقات بھی شروع کردی ہیں۔