سعودی وزیرِ دفاع شہزادہ خالد بن سلمان، ترک وزرائے خارجہ و دفاع اور ترک عسکری قیادت سے اہم ملاقاتیں کیں
باہمی دلچسپی کے امور، دوطرفہ دفاعی تعاون اور خطے کی مجموعی سکیورٹی صورتحال پر تفصیلی تبادلہ خیال کیا گیا
راولپنڈی:پاک مسلح افواج کے سربراہ اور چیف آف ڈیفنس فورسز (COAS & CDF) فیلڈ مارشل سید عاصم منیر اپنے سرکاری دورے پر ترکیہ کے تاریخی شہر استنبول میں موجود ہیں، جہاں انہوں نے کئی اہم اور اعلیٰ سطحی مصروفات میں حصہ لیا۔
دورے کے دوران انہوں نے سعودی عرب کے وزیرِ دفاع شہزادہ خالد بن سلمان بن عبدالعزیز آل سعود، ترکیہ کے وزیرِ خارجہ ہکان فدان، وزیرِ قومی دفاع یاشار گولر اور ترک چیف آف جنرل اسٹاف جنرل سلچوک بائراکتاروغلو سے الگ الگ ملاقاتیں کیں۔
ان ملاقاتوں میں پاکستان، ترکیہ اور سعودی عرب کے مابین دیرینہ اور برادرانہ تعلقات کو مزید فروغ دینے، باہمی دفاعی تعاون کو وسعت دینے اور خطے کی موجودہ سکیورٹی صورتحال پر غور کیا گیا۔
آئی ایس پی آر کے مطابق فیلڈ مارشل سید عاصم منیر نے "مکہ جوائنٹ ڈیفنس ایگریمنٹ” کے تحت تشکیل دی جانے والی اسٹریٹجک پولیٹیکل اینڈ ڈیفنس کمیٹی کے اجلاس میں بھی شرکت کی۔ اس اجلاس میں تینوں ممالک کے عسکری اور سیاسی رہنماؤں نے مشترکہ دفاع اور اسٹریٹجک کوآرڈینیشن کو مزید مستحکم بنانے کے لیے مختلف تجاویز کا جائزہ لیا۔
تینوں برادر اسلامی ممالک کے درمیان اس بڑھتے ہوئے دفاعی اشتراک کو خطے میں امن، استحکام اور اجتماعی دفاع کے لیے ایک اہم سنگِ میل قرار دیا جا رہا ہے۔