"سستی نہیں، مفت سبزی”:مظفر گڑھ سے شروع ہونے والا مثالی منصوبہ پورے پنجاب میں پھیلانے کا فیصلہ

لاہور/مظفر گڑھ:وزیراعلیٰ پنجاب مریم نواز شریف کی ہدایت پر مظفر گڑھ میں ایک منفرد اور مثالی فلاحی منصوبے "سانجھی سبزی” کا آغاز کر دیا گیا ہے، جس کے تحت عوام کو مفت اور تازہ موسمی سبزیاں فراہم کی جا رہی ہیں۔
اس پراجیکٹ کا آغاز مظفر گڑھ میں کرسچن برادری کے ایک گاؤں سے کیا گیا، جس کے بعد اس کا دائرہ کار پورے ضلع تک پھیلا دیا گیا ہے۔ ڈپٹی کمشنر مظفر گڑھ محمد عثمان طاہر جپہ نے وزیراعلیٰ کو بریفنگ دیتے ہوئے بتایا کہ شہر اور دیہات میں سرکاری عمارتوں، صحت، تعلیم، فارسٹ اور لوکل گورنمنٹ کے دفاتر سے متصل خالی پڑی اراضی کو کارآمد بنایا گیا ہے۔ اب تک 139 کنال اراضی پر 140 پلاٹس بنائے گئے ہیں جہاں مقامی لوگ خود سبزیاں کاشت کر رہے ہیں۔ دلچسپ بات یہ ہے کہ اس منصوبے سے متاثر ہو کر اب مقامی شہری رضاکارانہ طور پر دوسروں کے لیے بھی سبزیاں اگانے میں مصروف ہیں۔

وزیراعلیٰ پنجاب مریم نواز شریف نے اس عوامی فلاحی اقدام کو زبردست الفاظ میں سراہا اور اسے دیگر اضلاع کے لیے بھی قابلِ تقلید قرار دیا۔ وزیراعلیٰ نے ڈپٹی کمشنر مظفر گڑھ کی کارکردگی پر انہیں ‘چیف منسٹر میرٹ بیج’ اور ایک لاکھ روپے نقد انعام سے نوازا۔ مریم نواز نے تمام ڈپٹی کمشنرز کو ہدایت کی ہے کہ وہ اپنے اپنے اضلاع میں "سانجھی سبزی” پراجیکٹ کا آغاز کریں تاکہ مہنگائی کے اس دور میں عوام کو مفت سبزیاں دستیاب ہو سکیں۔
وزیراعلیٰ نے ہدایت کی کہ سرکاری اراضی کو غیر آباد رکھنے کے بجائے اسے عوامی مفاد کے لیے استعمال میں لایا جائے۔ انہوں نے اس پراجیکٹ کو مستقل بنیادوں پر جاری رکھنے اور اس کے دائرہ کار کو مزید وسیع کرنے کے احکامات بھی جاری کیے ہیں۔