کراچی: امریکا اور اسرائیل کی ایران کے خلاف جاری جنگ کے پیش نظر پاکستان سٹاک ایکسچینج میں کاروبار کا آغاز 15000 پوائنٹس سے زیادہ کی کمی کے ساتھ ہوا جس کے بعد کاروبار معطل کر دیا گیا۔
مقامی وقت کے مطابق ساڑھے نو بجے مارکیٹ کھلنے کے بعد 100 انڈیکس میں 15334 پوائنٹس کی کمی ریکارڈ کی گئی جو کہ تقریباًً 8.9 فیصد بنتی ہے۔ اس کے بعد مارکیٹ میں کاروبار عارضی طور پر معطل کیا گیا۔ جسے سرکٹ بریکر کہتے ہیں تاہمپاکستان سٹاک ٹریڈنگ میں پیر کی صبح عارضی معطلی کے بعد کاروبار دوبارہ شروع ہو گیا ہے، جبکہ انڈیکس 1344 پوائنٹس کی کمی کے ساتھ ٹریڈ کر رہا ہے۔
تجزیہ کاروں کے مطابق پاکستان سٹاک مارکیٹ میں مندی کی توقع تھی کیونکہ خطے میں امریکا اور اسرائیل کی جنگ کے خلاف جنگ کے دوران پورا خطہ جنگ کی زد میں آچکا ہے۔
تجزیہ کار شہریار بٹ نے بی بی سی کو بتایا کہ مارکیٹ میں جیسے ہی کاروبار کا آغاز ہوا تو انڈیکس میں ریکارڈ کمی ہوئی جس کے بعد اسے قواعد کے مطابق معطل کرنا پڑا تاکہ سرمایہ کار گھبراہٹ میں مزید حصص کی فروخت نہ کریں۔
انھوں نے کہا کہ اعلیٰ ایرانی قیادت کی ہلاکت کے بعد پوری دینا کی سٹاک مارکیٹس میں اس وقت شدید مندی کا رجحان ہے جس میں انڈیا، ڈاؤ جونز اور ایشین منڈیاں شامل ہیں۔
وہ کہتے ہیں کہ ’جاپان کی سٹاک مارکیٹ میں کمی ریکارڈ کی گئی اسی طرح کورین سٹاک مارکیٹ بھی شدید مندی کا شکار ہے۔ دوسری جانب خطے میں جنگ کی وجہ سے دبئی اور ابو ظہبی سٹاک مارکیٹ میں کاروبار سوموار اور منگل کو بند رہے گا۔‘