لاہور:وزیراعلیٰ پنجاب مریم نواز شریف نے صوبے کے ہر ضلع میں سٹروک مینجمنٹ سنٹر قائم کرنے کی منظوری دے دی ہے جبکہ ہر ڈی ایچ کیو میں نیورالوجسٹ اور پیڈز نیورالوجسٹ کی تعیناتی کا اُصولی فیصلہ بھی کر لیا گیا ہے۔ وزیراعلیٰ نے ہدایت کی ہے کہ ہر ضلع میں ایک ڈاکٹر اور ایک نرس کو فوری طور پر تین ماہ کی سٹروک مینجمنٹ ٹریننگ دی جائے۔
وزیراعلیٰ مریم نواز شریف نے سٹروک کے مریضوں کیلئے فوری طور پر ٹیلی میڈیسن پراجیکٹ شروع کرنے کا حکم دیا ہے، جس کے تحت ضلعی ہسپتالوں کے ڈاکٹر فالج کے مریض کے فوری علاج کیلئے سپیشلسٹ اور کنسلٹنٹس سے ٹیلی فونک رابطہ کر سکیں گے۔ انہوں نے سٹروک مینجمنٹ سنٹرز کیلئے نرسز ٹریننگ پروگرام شروع کرنے اور ریسکیورز کو سٹروک مینجمنٹ کی تربیت دینے کیلئے اقدامات کی بھی ہدایت کی۔
وزیراعلیٰ نے فالج کے علاج کیلئے عوامی آگاہی مہم شروع کرنے کا اعلان کرتے ہوئے کہا کہ فالج کے علاج میں گولڈن آورز کی اہمیت مسلمہ ہے اور اس آگاہی مہم کی قیادت وہ خود کریں گی۔ مریم نواز شریف نے کہا کہ پنجاب کے ہر چلڈرن ہسپتال میں بھی سٹروک مینجمنٹ سنٹر قائم کیا جائے گا اور حکومت چاہتی ہے کہ کسی مریض کو علاج کیلئے بڑے شہروں کا رخ نہ کرنا پڑے۔
اجلاس میں پمز کے نیورالوجسٹ ڈاکٹر قاسم بشیر نے سٹروک مینجمنٹ پروگرام پر بریفنگ دیتے ہوئے بتایا کہ 25 سال سے زائد العمر ہر چار میں سے ایک شخص کو فالج کا خطرہ لاحق ہوتا ہے اور فالج کے پری ہاسپٹل، ہاسپٹل اور پوسٹ ہاسپٹل کیئر کیلئے آگاہی اور تربیت ناگزیر ہے۔