لاہور: وزیراعلیٰ پنجاب مریم نواز شریف نے ذیابیطس کے عالمی دن کے موقع پر عوام سے خطاب کرتے ہوئے اس مرض کو ایک خطرناک اور خاموش دشمن قرار دیا۔ انہوں نے کہا کہ احتیاط، آگاہی اور مناسب نظمِ زندگی سے ذیابیطس پر قابو پایا جا سکتا ہے اور بڑھتی ہوئی شرح اس بیماری کے خلاف مؤثر اقدامات کی متقاضی ہے۔
مریم نواز شریف نے کہا کہ صحت ہر شہری کا بنیادی حق ہے اور حکومت پنجاب اس حق کو ہر دروازے تک پہنچا رہی ہے۔ ٹائپ-ون شوگر کے مریض بچوں کو انسولین کٹس فراہم کی جا رہی ہیں اور تمام سرکاری ہسپتالوں میں مفت ادویات کی دستیابی یقینی بنائی گئی ہے۔
وزیر اعلیٰ نے شہریوں سے اپیل کی کہ وہ اپنی صحت کے محافظ بنیں، مناسب طرزِ زندگی اپنائیں، متوازن غذا لیں، باقاعدہ ورزش کریں اور بلڈ شوگر کی مستقل نگرانی کریں کیونکہ یہی ذیابیطس سے تحفظ کی اصل کنجی ہے۔