اسلام آباد :وزیر اعظم شہباز شریف کا کہنا ہے کہ انھوں نے اپنی جماعت کو 27ویں آئینی ترمیم کے مسودے میں وزیراعظم کو دی جانے والی استثنیٰ کی تجویز واپس لینے کی ہدایت دی ہے۔
ایکس پر ایک پیغام میں ان کا کہنا ہے کہ چند سینیٹرز نے وزیراعظم کے استثنیٰ کے حوالے سے ترمیمی شق سینیٹ میں پیش کی جو کابینہ سے منظور شدہ مسودے میں شامل نہیں تھی۔ معزز سینیٹرز کے خلوص کا شکریہ ادا کرتے ہوئے، میں نے انھیں یہ ترمیم فی الفور واپس لینے کی ہدایت کی ہے۔
بروں کے مطابق اس مسودے میں ایک موقع پر صدر اور وزیر اعظم کے لیے تاحیات استثنیٰ کی تجویز دی گئی تھی۔ تاہم ان خبروں کی تصدیق نہیں ہو سکی اور نہ ہی کمیٹی کی طرف سے کوئی منظوری سامنے آئی ہے۔
قومی اسمبلی سیکریٹریٹ سے جاری ہونے والے ایک بیان میں کہا گیا ہے کہ کمیٹی میں جب صدر اور وزیراعظم کو استثنی دینے کی بات ہوئی تو چیئرمین سینیٹ اور سپیکر قومی اسمبلی کے لیے بھی استثنی کی تجویز سامنے آئی تھی۔
اس بیان میں مزید کہا گیا ہے کہ سپیکر قومی اسمبلی سردار ایاز صادق نے آرٹیکل 248 کے تحت استثنیٰ لینے سے یکسر انکار کیا ہے۔ ان کا کہنا ہے کہ میں عوام کا منتخب کردہ نمائندہ پہلے ہوں۔ عہدے دار بعد میں ہوں۔ کوئی استثنیٰ نہیں چاہیے۔
