لاہور: (حافظ نعیم سے ) سابق وزیراعظم میاں محمد نواز شریف غیر ملکی ایئرلائن کے ذریعے لاہور سے لندن روانہ ہو گئے۔برطانیہ میں اہم ملاقاتیں کریں گے۔
خاندانی ذرائع کاکہنا ہے کہ پاکستان مسلم لیگ ن کے صدر اور سابق وزیراعظم آج جاتی امرا رائیونڈ سے علامہ اقبال انٹرنیشنل ایئرپورٹ پہنچے، جہاں سے وہ غیر ملکی ایئرلائن قطر ایئرویز کی پرواز کے ذریعے لندن روانہ ہوئے۔قبل ازیں جاتی امرا رائیونڈ میں نواز شریف کی روانگی کی تمام تر تیاریاں مکمل کی گئیں۔ ذرائع کے مطابق نواز شریف کا لندن میں قیام تقریبا 2 ہفتے طویل ہونے کا امکان ہے۔ نواز شریف لندن میں اپنا معمول کا طبی معائنہ بھی کروائیں گے۔
یاد رہے کہ نواز شریف نے کچھ روز قبل پنجاب انسٹی ٹیوٹ آف نیوروسائنسز میں اپنا چیک اپ بھی کروایا تھا، جہاں ان کی گردن کی ایم آر آئی بھی کی گئی تھی۔ نواز شریف کو پٹھوں میں درد کی شکایت سامنے آئی تھی۔
اس سے قبل نواز شریف رواں سال جون میں لندن گئے تھے۔
ذرائع کے مطابق وزیراعظم شہباز شریف 19 ستمبر کو پہنچیں گے۔ 20 کو نواز شریف، شہباز شریف لندن میں اہم ملاقاتیں کریں گے۔ پارٹی عہدیداروں، کارکنوں، بزنس کمیونٹی سے ملاقاتیں طے ہو چکے ہیں نون لیگ برطانیہ کے زیر اہتمام ایک بڑی تقریب سے نوازشریف، شہباز شریف خطاب کریں گے۔