اڈیالہ جیل سے متعلق بڑا انکشاف، محکمہ صحت اور جیل حکام کی دوڑیں لگ گئیں

راولپنڈی کی سینٹرل جیل (اڈیالہ جیل) میں 148ایچ آئی وی (ایڈز) کے مریضوں کی بڑی تعداد سامنے آئی ہے، یہ اب تک پنجاب کی کسی بھی جیل میں  ایڈز کے مریضوں کی سب سے زیادہ تعداد ہے۔

اڈیالہ جیل حالیہ دنوں میں خبروں میں اس لیے بھی رہی ہے کہ سابق وزیرِاعظم عمران خان بھی یہاں قید ہیں، تاہم یہ بات ذہن نشین رہنی چاہیے کہ عمران خان کو الگ تھلگ رکھا گیا ہے اور انہیں دیگر قیدیوں کے ساتھ میل جول کی اجازت نہیں۔

اس وقت یہ جیل شدید حد تک گنجائش سے زیادہ بھری ہوئی ہے، جہاں ایک ہزار 994 قیدیوں کی گنجائش کے مقابلے میں 4 ہزار 337 قیدی موجود ہیں۔

پنجاب ایڈز کنٹرول پروگرام کی رپورٹ کے مطابق صوبے کی 43 جیلوں میں مجموعی طور پر 645 قیدی ایچ آئی وی سے متاثر ہیں، ان میں سے کچھ پہلے ہی اینٹی ریٹرو وائرل تھراپی (اے آر ٹی) لے رہے ہیں۔