لاہور [اسٹاف رپورٹر] ڈائریکٹر جنرل ایل ڈی اے طاہر فاروق کی ہدایت پر ٹاؤن پلاننگ ونگ متحرک ہو گیا ہے۔ ایل ڈی اے کنٹرولڈ ایریا میں غیرقانونی کمرشل عمارتوں کے خلاف بھرپور کارروائیاں جاری ہیں۔
ایل ڈی اے کی ٹیموں نے گلبرگ، گارڈن ٹاؤن، فیصل ٹاؤن، گلشن راوی، سمن آباد، شاد باغ، وحدت روڈ، اور سبزہ زار کے مختلف علاقوں میں آپریشن کرتے ہوئے مجموعی طور پر 77 املاک سیل کر دیں۔
ایل ڈی اے کی جانب سے گلبرگ، گارڈن ٹاؤن اور فیصل ٹاؤن میں غیرقانونی کمرشل استعمال اور کمرشل فیس کی عدم ادائیگی پر 33 املاک سیل کی گئیں۔ گلشن راوی، سمن آباد اور شاد باغ میں 18 املاک کو غیرقانونی کمرشل استعمال پر سیل کیا گیا جبکہ وحدت روڈ اور سبزہ زار میں ریکوری آپریشن کے دوران مزید 26 املاک سیل کی گئیں۔سیل کی گئی املاک میں نجی بینک، نجی سکول، کلینک، فوڈ پوائنٹ، لیبارٹری، ہوٹل، فارمیسی، بیکری، شوز شاپ، کلاتھ شاپ، ورکشاپ، دکانیں اور دفاتر شامل ہیں۔
یہ آپریشن چیف ٹاؤن پلانر اسد الزمان کی زیر نگرانی کیا گیا۔ ڈی جی ایل ڈی اے کا کہنا ہے کہ غیرقانونی کمرشل عمارتوں اور کمرشل فیس نادہندگان کے خلاف بلاامتیاز کارروائیاں جاری رہیں گی۔